《情願你狠心傷我，都唔好講好說話吊住我條命》

以前細個好怕做衰人，愛情又好，友情都好，總係好介意人地點諗自己，所以就拼命去做好人。但後來長大咗，就知道有啲時候唔應該做爛好人，要學識去做衰人。

例如分手嘅時候，如果你係決定咗要離開就千萬唔好再扮咩好人。我聽過最卑鄙嘅分手說話係「呢個世界話唔埋嘅，可能有日我哋又會喺番埋一齊呢～」，真係以為今日留一線，日後會好相見，廢話！又有啲人分手係會話我哋做番朋友啦，呢啲根本就係吊住被分手嗰方條命，搞到人哋無法放低。又例如有人同自己表白嘅時候。細個會覺得拒絕對方好hurt，唔想令對方太難堪就講啲懶好人嘅說話，結果只會令到對方以為自己有一絲希望。

當你試過做單戀人或者被放棄嗰個，你就會明白，長痛不如短痛。與其你呢刻講啲冠冕堂皇嘅好說話安慰，不如你做個好心，講番最殘酷嘅真話，等我可以認清事實，徹底死心。

如果真係想做好人，就唔好畀假希望對方。對自己對對方都坦白啲，起碼對方可以早啲死心，早啲搵過個好人家。