想男朋友上進 呢個方法最有效

男人最怕，應該係當女朋友睇到身邊啲「姊妹」嘅豪華婚禮相、講人哋男朋友做乜工、搵幾多萬一個月，然後一副羨慕嘅表情。

「你睇下人哋？」再加一句：「你可唔可以有上進心啲？」呢個組合，唔知扼殺咗幾多對本來白頭到老嘅情侶。女嘅決定搵個更好，男的覺得對方唔夠體諒，喺埋一齊，只係識講錢。

當然，我女朋友都講過呢番說話，而我又非常咁符合劇情地好躁底咁答：「妳咁鍾意錢咪去搵第二個囉！」

幾次重重複複嘅爭論後，我終於知道點樣打破呢個「女朋友覺得男朋友唔夠上進」嘅矛盾局面⋯⋯

女人怕比較，愛面子嘅男人可能更加討厭比較。「男人唔可以窮」呢個道理，係男人都明，奈可現實中，正正常常打份工，其實等於捱窮。

有邊個唔想自己女朋友將來好似徐子淇咁幸福？奈何我哋嘅爸爸唔係李兆基，亦都只係個畀老婆話唔夠上進嘅打工仔⋯⋯樓都冇留低一層⋯⋯

有一晚半夜，我壓力好大，send咗個訊息畀應該瞓緊覺嘅女朋友：「其實我已經好畀心機儲錢，希望將來可以令妳幸福啲，但我未必可以令妳做歎世界嘅少奶奶⋯⋯」

然後，我嘆口氣諗住瞓之際，收到佢答：「我依家已經係少奶奶啦！」

我：「點會⋯⋯妳咪又係要返工，見到想買嘅衫都要忍手唔買，旅行又要儲好耐錢⋯」

佢：「一個幸福嘅女人唔係講錢，起碼我覺得唔係。我知道你將來都會努力，將最好嘅畀晒我，咁先係幸福，已經好夠。」

佢仲send咗張自拍嚟，笑得好開心咁。

大概每個男人最希望，係見到自己老婆喺床上面瞓得好冧，畀到一個好舒服嘅屋企佢，令佢發夢都甜笑緊。

呢個係努力工作嘅最大動力。

想男朋友有上進心，要記住，男人受軟唔受硬，你將佢同人比較，佢會好躁；但當妳話：「唔緊要啦，唔介意陪你捱」，佢就會仆心仆命，幾辛苦都頂硬上，令妳幸福。

所以，妳仲唔快啲同男朋友講聲：「唔介意陪你捱呀，加油！」

目標為本，為咗將來幸福，妳知點做啦！

FB: 莎比亞