愛回家｜傳82歲保安員「申叔」李海生退休 效力TVB近40年 上月低調離巢

TVB處境劇《愛·回家之開心速遞》一星期播足7日，食飯時間打開電視都會見到佢哋，除咗令唔少劇中主角成功入屋之外，唔少配角都備受關注，當中包括喺劇中飾演接龍集團保安員「申叔」嘅82歲資深演員李海生，近日有消息傳出佢喺上個月已經低調離巢效力近40年嘅TVB，退休安享晚年。

1963年參選「香港先生」並獲得冠軍嘅李海生，由於小時候屋企家貧嘅關係，自細冇咩娛樂，不過就超鍾意去泳棚游水，所以練得一身健碩身形。李海生指自己喺30歲先開始學習功夫，與狄龍係同門師兄弟。之後佢獲得狄龍推薦加入娛樂圈，入行後參與多套香港及台灣嘅經典功夫電影。去到1984年，李海生加入TVB做演員，除咗飾演唔少武打角色之外，佢亦因光頭關係，飾演唔少得道高僧角色，所以有「TVB打手王」之稱。後來，佢年紀越來越大，由武打演員轉型做小人物角色，當中以《愛·回家之開心速遞》接龍集團保安員申叔一角最為入屋。不過微博有消息指佢喺上個月已經低調離巢，所以佢喺劇中同清潔部頌姐（劉桂芳飾）嘅戀情，睇嚟都要無疾而終啦！

消息傳出後，唔少網民都紛紛留言表示不捨，例如：「挺喜歡看他演戲的，雖然有點可惜，希望身體健康吧！」、「熟悉的臉又少一個了」、「80歲的慢慢都退了，希望退休後好好休息。」及「早些享兒孫福也是好事！」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！