愛回家｜再惡搞何伯及新何太 「鵝太」即將登場 網民反感：可否投訴叫佢咪播

TVB處境劇《愛·回家之開心速遞》過往都有將唔同社會時事或熱話加入到劇本創作中，近日娛樂新聞主持之一嘅劉倬昕就喺社交平台分享與「鵝太」合照，其造型超級似日前全城熱哄哄關注嘅「新何太」。

何伯與新何太被《東張西望》報道後成為城中熱話，新何太最近於直播期間不時大聲喝罵何伯，更自爆有意改嫁去美國，以及計劃帶埋何伯去當地做管家，何伯聽到後顯得非常傷心，又再掀起網民關注。唔少《愛·回家》劇迷一直都希望編劇可以將何伯與新何太事件放喺劇情之中，劇組近日終於加入「鵝太」一角；娛樂新聞主持之一嘅劉倬昕於上周（18日）PO出與「鵝太」合照，寫道：「諗住去初戀Cafe嘆個下午茶，竟然比我撞到鵝太，大家有咩說話想同佢講？#愛回家之開心速遞 #群姐 #許思敏」，從照片所見，「鵝太」由「群姐」許思敏飾演，細心一睇無論髮型、珍珠鏈及衣著打扮都似足何太當日接受《東張西望》訪問時嘅造型。

有網民將照片分享到FB群組「何伯&何伯老婆關注組」，有網民表示期待，不過都有網民叫TVB唔好再抽水，又指群姐扮得唔似，都係之前阮兆祥扮得似啲：「呢集一定要睇」、「夠喇！吾好再抽何馬水，幫佢宣傳，要嘔」、「可否投訴叫佢咪播呢？ 仲睇佢唔夠牙」、「太瘦，都係阮兆祥扮好啲」、「一啲都唔似，抽水都搵個好少少啦」、「一啲都唔似啦！搵祥仔做就差唔多」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！