感激高麗虹包容臭脾氣 洪金寶為孫仔收火

洪金寶是二十四孝爺爺，不時弄孫為樂，很想教兩個孫仔功夫的他，卻怕自己脾氣大嚇親孫仔，現在先努力學習收斂。而提起兩個孫仔，其嘴角不自覺向上翹︰「我脾氣差，成日覺得喝啲孫唔啱，好似孫仔瞓瞓吓喊，搞到我炆，半夜三更喊完又喊，我就大喝︰『瞓覺！』之後孫仔話︰『我以後唔嚟！我好驚！爺爺鬧我。』唉，以後我唔敢再咁惡，費事佢以後唔嚟。」

現在為孫兒收火，但當年洪金寶是嚴父，子女犯錯他會藤條侍候︰「佢哋細個嗰陣，三個都喺加拿大讀書，我喺香港搵食、搏命，大家溝通上都有問題。我會打㗎！打佢哋屁股，打嗰陣郁一郁，唔算，再打，但打之前我會先問佢︰『你係咪犯錯？』不過我思想好開放，到佢哋十幾歲，同仔女相處就似朋友。」

教子女的方式，洪金寶頗受師傅于占元影響，認為教小朋友一定要嚴，嚴厲才能成大器，所以「七小福」除了他，師弟成龍、元彪個個在影壇都獨當一面，他說「七小福」同甘共苦學藝七年，令他畢生難忘。眾師兄弟中，他逃學最多，經常被于占元毒打。當年每天練功由清晨7時到深夜11時，身心疲累，但卻練得一身好武功︰「教功夫係要惡、打到飛起至得，我嗰陣都成日逃學，因為太痛苦，師傅打親都好甘。我哋師兄弟踎一個竇口七年，感情好深厚，我哋呢啲係日夜陪伴你喎。就因為太痛苦，當年大仔天明愛功夫，我都冇教，唔忍心佢辛苦。」

洪金寶有三子一女，全是與第一任中、韓混血兒妻子曹恩玉所生，三個兒子天明、天祥及天照都投身演藝界，天祥夾band兼做武指，不過三人中，以天明身手最好，洪金寶坦言希望有日可以父子班合作。他一臉自豪說︰「唔知係咪遺傳因子，天明身手好好，好多高難度動作佢都做到，如果當初親自教佢，可以提點佢好多嘢。但當時我拍戲太忙，佢又讀緊書，我冇諗過畀佢入行。我係過來人，練功夫好辛苦，又會受傷，唔想佢捱。後來佢想入行，我又離開咗電影圈好耐，所以一直都冇合作。而家有諗，我三個仔都唔錯，父子班合作有啲噱頭，我希望有日會實現。」洪金寶坦言拍動作片太苦︰「成日都受傷，最嚴重除咗膝蓋，就係尾龍骨。」問到斷手斷腳次數，他說：「太多嘞！我隻手斷過三次，隻腳甩骹七次，好在甩唔晒仲黐住。冇計，搵食嘛。」

重情重義的個性，令洪金寶廣結人緣，多年沒拍港片的他，最近友情價接拍林敏驄賀歲片《如珠如寶》，也是因為惜緣，洪金寶說︰「接呢部戲係因為驄仔，我哋好多年前合作好開心，佢嗌到我實幫手，我叫佢畀個劇本我睇吓先，咁叫我殺人放火、強姦梗唔會做，喜劇我冇問題。」

洪金寶說很欣賞林敏驄︰「因為佢夠怪吖嘛，九唔搭八，無厘頭。」此時林敏驄走過來插嘴︰「你講我呀？」洪金寶回應︰「好似係啩，講你好話，林sir叫到，我梗要嚟，劇本係睇唔明，咪嚟到先問囉！」林敏驄接口︰「以大哥咁嘅身家，第二啲問都唔使問，就咁丟咗佢。」最後洪金寶好抵死回敬一句︰「你下次唔好嘞！」

撰文︰祖李