成日請小鳳姐出場 你哋對佢又有幾多認識呢？

「熱烈地彈琴，熱烈地唱」呢兩句歌詞一出，大家都會知道呢首歌就係徐小鳳嘅《喜氣洋洋》。呢首歌發行於1979年，已經有40年歷史嘅喜慶歌曲，近年已經變為暗諷別人，落井下石之歌。但其實大家對徐小鳳又有幾多認識呢？

徐小鳳於16歲參加歌唱比賽，之後展開佢嘅「金光燦爛」星途，早期於夜總會唱歌表演，直至1978年首次幫無綫唱劇集主題曲《大亨》。之後就同多位樂壇強人合作，例如有顧嘉煇、鄭國江、蔡國權等等。

對上一代嘅人嚟講徐小鳳當然係一代經典女歌手，但年青一輩對佢嘅印象就係每次演唱會都會穿着嘅波點裙。呢個造型更加比多位藝人模仿。但係小鳳姐嘅演唱會又何止波點裙呢！小鳳姐近年分別於2014、2016及2018年舉行演唱會，要知道小鳳姐其實今年已經有70歲，但係佢喺台上嘅表現依然十分出色，而且佢除咗唱功同舞台表演能夠保持狀態之外，佢喺台上生動貼地嘅「棟篤笑」表演亦都係另一個賣點。

而除咗波點裙，小鳳姐喺演唱會上面嘅衣着亦係焦點之一。其中小鳳姐會穿着難道極高嘅束腰裝出塲，但係年紀唔輕嘅小鳳姐仍然能夠以22吋腰圍征服束腰裝。近年無論小鳳姐開幾多場演唱會，最後都會全場爆滿，更會出現一陣嘅搶購門票熱潮。

但係現實生活中小鳳姐深居簡出，甚少俾傳媒見到佢嘅私生活。但係現時仍然單身嘅小鳳姐原來喺1974年嘅時候，同名嘴鄭經翰結為夫婦，不過婚姻維持五年就完結，但呢件事直至到90年代中期先有媒體報道，亦有傳鄭經翰喺商台主持節目時段，禁止員工播放徐小鳳歌曲，唔通佢兩個嘅婚姻真係「婚紗背後」？