4大打卡精品火鍋店 東南亞風情、古代青樓主題

鍾意四圍搵食同打卡嘅朋友仔，除咗揀高級餐廳或者文青Cafe外，仲可以考慮下精品火鍋店喎。好似以下呢4間咁，都有唔同嘅主題，包括花花主題、東南亞風情、古代青樓同宮廷風，打邊爐之餘仲可以享受埋裝修！

復古花花主題 香江花月

打卡位多到數唔晒嘅火鍋店！以50年代舊香港風為主題，好似等候區係一條好夢幻嘅泡泡時光隧道，另外仲有由多部古董電話組成嘅牆身、藥材舖嘅百子櫃子戥秤及雜貨店嘅滑輪等，充滿舊香港情懷～食物方面當然要食最啱相機食先嘅香江拼，即係牛肉拼盤，以原木圓盤奉上，將各款牛肉捲成玫瑰花朵般，真係超靚～湯底就推介招牌牛乳玫瑰鍋，選用日本北海道全脂牛乳配上來自日本嘅玫瑰，多咗一份花嘅清香～配料方面七彩餃子同自家製三色墨魚丸都一樣又靚又好食。

懷舊東南亞格調 起鍋

一去到餐廳門口見到掛咗好多七彩燈籠，已經有種去咗東南亞嘅感覺啦～唔單止裝修，連食物都好有泰國風味，如香茅青酒煮蜆湯，淡淡嘅酒香同香茅味道，蜆嘅鮮甜就好突出，聽講用咗半斤蜆肉，食前真係要飲返碗。配料要叫佢哋最出名嘅騸牯牛，有吊龍、池板等部位，牛味都好重，各有好味之處。醬料區都好多款式嘅醬汁揀，包括東南亞地區常用既香料如青檸、南薑、金不換及檸檬葉等，真係好有風味～

古代青樓主題 怡紅院火鍋料理 

真係夠晒gimmick嘅主題餐廳呀，以古時嘅青樓做主題，無論食物、飲品定裝潢都好吸睛！連食物同飲品嘅Menu都製成賣身契同怡紅寶鑑，好有心思。湯底推介養顏濃厚花膠雞鍋，加入豬皮、豬骨、8-10隻全雞、花膠同響螺等材料熬製6小時以上，味道好香濃！另外仲有避風塘炒肉蟹鍋，肥美大肉蟹，加生熟蒜炒香，炒肉蟹多肉惹味，加入湯後有陣陣蒜香同豆豉味。牛肉方面都有唔少稀有部位畀大家試㗎～

宮廷風特色主題 香香宮煮 

去完青樓又可以去古代宮廷行下，尖沙咀呢間火鍋就行宮廷風，除咗有得食仲有得玩，可以喺大廳位置著宮廷服裝坐喺龍椅度影相，又幾有趣。湯底都係以宮廷人物命名，如雍穆公主‧花膠雞湯鍋同普安公主‧黑胡椒肉蟹濃湯鍋咁，另外推介大家叫即炸黃金炒響鈴，即叫即炸一上碟就聞到好香嘅鹹蛋黃味，每一條都幾乎沾滿咗流沙鹹蛋黃醬，好邪惡！

文: Yanica