《揀個孝順，而非愚孝嘅男人》

阿婆教落揀男人要揀個孝順父母嘅男仔，雖說孝順嘅唔一定係好男人，但唔孝順嘅就一定唔係好男人。不過記住孝順係指懂得感恩，懂得報答父母。而嗰啲聽哂父母話，事事以父母為先，將父母排喺自己同老婆囝囡前面嘅，就係愚孝。

千其唔好揀個愚孝嘅MaMa Boy。

我有個朋友就係同緊一個MaMa Boy一齊，男仔都好錫佢，一直都相安無事，女仔仲覺得男朋友咁孝順係個百年難得一見嘅好男人。最近佢哋打算結婚，於是問題就開始出現，兩個人本來都希望簡簡單單簽個紙食個飯就算，但有日男仔同媽媽傾完之後，就改變主意，因為媽媽係傳統嘅人，希望擺個酒做齊儀式，男仔就覺得一生人一次都要滿足媽媽嘅願望⋯⋯

然後就陸陸續續出現好多「我阿媽話咩咩咩咩⋯⋯」「老人家咪滿足下佢囉」，結果男仔好似無咗自由意志咁咩都阿媽話，完全漠視咗女仔嘅想法。唔難想像佢哋日後生仔之後嘅婆媳糾紛，然後老公做磨心等等嘅問題。

孝順係好男人其中一個元素，但係要搵個聰明嘅男人，因為一個盲目將父母放喺你前面，永遠先聽父母意見嘅男人，會令你過得委屈又不忿。做男人，要孝順，都要孝順得聰明啲。