換命真相︳林敬剛返鄉下發展陳皮事業 拍劇做生意中港兩邊走

現年51歲嘅無綫綠葉藝人林敬剛，多年嚟喺劇集飾演過唔少惡人及反派等角色，所以被封為「TVB御用惡人」。佢亦有份參演正在播映中嘅台慶劇《換命真相》，佢喺劇中飾演裝修工程判頭兼張旻（鄧佩儀飾）嘅姨丈，原來佢除咗拍劇之外，仲有喺廣東新會開柑園，升呢做陳皮大王。

林敬剛於80年代受劇集《新紮師兄》影響，決定投考香港警察少年訓練學校，不過喺入學堂前，被李修賢睇中拍電影《壯志雄心》。入學堂一個月後，對演戲產生興趣嘅佢決定辭職並到電影公司工作。1994年林敬剛加入無綫，展開演員生涯，參與多套劇集拍攝，例如《O記實錄》、《烈火雄心》、《潛行狙擊》、《鐵探》及《法證先鋒IV》等等，雖然佢喺好多劇集中飾演閒角，不過佢將「惡人」角色演得淋漓盡致，所以被封為「TVB御用惡人」。

喺今年四月，林敬剛出席內地電影《創業大贏家》開鏡活動時，向萬梓良跪地拜為師，後獲萬梓良賜名「林犇」，成為萬氏第四位徒弟，另外三人師兄分別是周星馳、林家棟和姜皓文。

除咗做演員之外，已經移居內地嘅林敬剛仲喺其鄉下廣東新會開柑園，呢個大柑園擁有佔地約200畝，而佢亦會親力親為種植「新會靚柑」。佢仲喺抖音拍片介紹果園，指每年的柑產量達到160萬斤，產量相當驚人，難怪有網民稱佢為「陳皮大王」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！