數你條命｜56歲黃澤鋒直言與同齡太太想追第二胎 Depp師傅話今年有機會生仔

J2最新風水命理節目《數你條命》由陳欣茵、吳兆麟、及靈魂談判師Depp擔任主持，日前節目以「數數子女命」為主題，邀請梁諾妍、吳若希、吳若希細佬吳梓楓、及黃澤鋒做嘉賓，透過「生命密碼」拆解子女運。黃澤鋒喺節目中直言與太太想追第二胎。

現年56歲嘅前無綫藝人黃澤鋒與同齡太太陳麗麗結婚13年，渴望擁有小朋友嘅佢哋終於喺2019年造人成功，以52歲高齡誕下囡囡「小黃妃」黃熙恩，囡囡擁有一雙又圓又大嘅眼睛，長得非常精靈可愛。黃澤鋒喺《數你條命》中直言與太太想追第二胎，：「我貪心嘅，我想知我有冇機會有第二個。我哋真係恨嘅，因為我貪心囉！咁所以問下數字，Depp師傅勁㗎嘛。」Depp師傅就話：「太太嘅磁場咁我就見到佢嘅貴人運大概係55至56歲嗰時開始有機會，所以呢一兩年你要搏命啦，呢兩年係最大機會嘅」，而佢亦即時話：「呢兩年要搏命啦！」咁幾時係佢哋最佳嘅造人時間？Depp師傅就話會喺農曆6至8月，黃澤鋒就話大概係暑假時間，所以喺呢個黃金時間要好努力，不過佢亦表示好忐忑，因為師傅話得，係佢唔知道得唔得，不過佢同太太都會搏埋佢，希望可以如願以償。黃澤鋒想生第二胎嘅原因就係怕囡囡悶，因為將來佢同太太老去，佢喺世上都會有另一個親人。

另外，黃澤鋒亦有指自己曾經搵堪輿學家睇風水，並話：「我想生第一個時都有搵人睇風水，擺咗四年就有，唔到你唔信，起碼個磁場係適合我哋造人，真係夢想成真。」而Depp師傅就話喺佢嘅「生命密碼」中指20歲、35歲及50歲前後嘅一兩年都有機會生女。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！