【2024新店精選】4月更新！ 海南雞主題店、歷史建築變Cafe

同好友聚餐，齊齊試新店就最過癮～開飯仔每個月會搜羅各區特色新餐廳，同大家緊貼潮流打卡嘆美食，即睇邊間啱你心水～

4月更新

老牌滷水店副線 榕基海南雞

大埔有32年歷史嘅街坊滷水店，自幾年前由90後年輕一輩接手，一直推出唔少創新菜式，深受街坊歡迎。今個月更喺大圍開設全新副線，主打嫩滑海南雞，仲有新加坡喇沙同特色咖啡飲。另外亦將部分總店菜式帶到新店，包括滷水豬頸肉、滷水牛三寶等。

聯和墟毛孩友善Cafe WAKE UP Bistro

三級歷史建築聯和市場活化後進駐唔少新店，當中就有呢間寵物友善café。裝潢走簡約路線，如保留白色主調，讓食客更容易感受昔日情懷；戶外座位仲可以帶同毛孩入座，一齊chill吓！師傅以本地時令有機蔬菜炮製多國菜，包括低溫雞肉紫薯沙律、三重芝士薄餅、烤美國安格斯肉眼扒等。

韓國過江龍 Samsam삼삼뼈국

呢間韓國fusion餐廳喺東大門受遊客同當地人歡迎，而家終於唔使飛，喺香港都食到喇！必食招牌名物土豆脊骨湯，分別有清湯同辣味選擇，湯底以骨頭慢火熬煮至濃郁奶白色，並用香菜調味，加埋軟腍嘅脊骨肉，好惹味啊！番茄羅勒燉豬脊骨都係推介菜式之一，配埋意大利麵、薯條同麵包，絕對係醫肚之選。仲有其他韓式燒肉、刀削麵、豬肉煎餅等，選擇好豐富～

3月更新

慢煮精緻西餐 紅館

原區搬舖後，餐廳大咗，裝潢優雅得嚟帶少少文青感覺，無論係閨密聚會或約會都好啱feel。餐廳由法國藍帶主廚主理，供應招牌慢煮料理配自家製醬汁外，亦有特色薑母鴨、澳洲M8和牛他他、孜然羊串等鮮味同香口料理，照顧唔同食客口味。

韓系佐酒菜 韓大叔大排檔

以韓大排檔為題嘅餐館，菜式比「大排檔」精緻，可以食到包括醬油蟹、醬油鮑魚同醬油蝦嘅醬油拼盤，啖啖都係鮮味。另外韓式煎餅、炸雞、人參雞湯等風味料理都一樣有供應。而店內放滿啤酒樽、當地食材等作佈置，成陣韓風出晒嚟呀！

摩登泰國菜 SO! BangKok Thai Eatery & Desserts

呢間裝潢時尚嘅泰國菜館，室內樓底高，以橙色作主調，設有特色石牆等佈置，而戶外兩排座位就採用露營為題，氣氛chill爆，好啱一班friend嚟聚餐。而餐點融入西式元素，例如有冬蔭功海鮮乾炒意粉、泰式涼拌煙三文魚等。另外各種咖喱、燒物佐酒一流。

2月更新

鰂魚涌手工純素烘焙店 Maya Bakery & Bar

新年食得豐富有罪惡感？呢間手工純素烘焙店可能幫到你，品牌標榜以天然食材製作港西Fusion糕點、麵包同茶點，其中招牌純素蛋撻、班蘭菠蘿包同開心果牛角包都係必試款式。另外西式口味都一樣有供應，純素發酵忌廉芝士、蘑菇發酵松露忌廉芝士酸種麵包就啱晒芝士控喇。飲品方面除咗濃縮咖啡康普茶等咖啡或健康飲品，亦有Honeybee Gin Tea等酒類飲品。

台灣過江品牌 胖老爹美式炸雞

由台灣過江嘅炸雞店唔一定係台式風味嘅，呢間外賣店就主打美式風味喇～佢嘅炸雞標榜即點即炸，落單後要等大約20分鐘或以上。炸雞沾上自家調配嘅醃漬粉、炸粉厚薄適中，入口香脆又有美式奶香風味，而鍾意食雞翼嘅朋友重可以揀全翼𠻹。配埋波霸花枝丸、台灣直送甜不辣等小食，外賣都可以好豐富。

西環葡萄酒主題小酒館 Crushed Wine Bar

酒友bookmark～由雙層葡萄酒零售店轉型為Wine Bar概念小酒館，酒香四溢嘅感覺特別chill。餐廳主打嘅3杯/5杯葡萄酒品酒套餐只需$180起，CP值幾高。而菜式創作靈感則以各種農產品，例如充滿創意嘅辣椒黑朱古力伴茄子。店家亦會提供wine pairing建議，好似烤韭葱伴杏仁蒜蓉泥可配質感豐富嘅Luddite Saboteur白酒；特色花生醬批就同Guthrie Family Wines Heirloom Grenache紅酒幾夾。

1月更新

北海道起家創意拉麵 竹麓拉麵

拉麵有幾多款口味？呢間拉麵店自1996年喺北海道開業至今，就創作多達500款拉麵喇～不過嚟到香港先以3款招牌拉麵同大家見面，包括九州豚頭背脂拉麵、和牛鹽風拉麵同名古屋雞湯拉麵。其中和牛鹽風拉麵唔只配上低溫慢煮鹿兒島A5福永和牛牛肋肉，連湯頭都加入日本產牛筋慢火煮熬，鮮味突出。

平鐵牛扒副線新分店 研香

由賣牛扒到到賣中式糖水都大受歡迎嘅品牌，今次約1,800呎嘅新分店，增設嘅甜品同飲品都加入西式元素！人氣嘅開心果露豆腐花就有新拍檔喇，包括開心果梳乎厘、開心果Latte等；另外亦照顧大眾口味，供應意大利芝士蛋糕同草莓味梳乎厘。而飲品重有「啜豆花」系列，以及競賽級咖啡𠻹，選擇多好多呀～

日本高質吉列豬扒 とんかつ専門店 宴美豚

嚟自日本嘅高質吉列豬品牌，以日本店嘅秘製配方，將北海道四元豚炸至金黃酥脆，食落香脆又juicy；客人重可以自行研磨芝麻製成個人風味嘅醬汁，令吉列豬更加惹味。而定食配搭清新椰菜可以免費追加，好解油膩感。而豬肉以外，吉列宮崎和牛石燒、宮崎和牛野菜火鍋、黑炭咖喱等都係唔錯嘅選擇。

文：Cathy