新聞女王|何依婷與高海寧鬧交被批表情浮誇令人出戲 網民:高Ling直接壓住佢
TVB台慶重頭劇《新聞女王》由佘詩曼、李施嬅及馬國明主演,喺星期一(20日)首播後成功贏得口碑及掀起網民熱烈討論。劇集以電視台新聞部作為背景,講述主播間嘅勾心鬥角權力鬥爭。噚晚第三集就講到SNK News首席女主播文慧心(佘詩曼飾)與首席男主播梁景仁(馬國明飾)處於對立,而兩派嘅手下徐曉薇(何依婷飾)及許詩晴(高海寧飾)同樣展開惡鬥,當中嘅鬧交情節引起網民熱議。
《新聞女王》喺噚晚(22日)嘅高潮位就係何依婷與高海寧嘅鬧交情節,何依婷喺收到佘詩曼嘅電話後,表現得非常愕然,之後就衝去休息室發惡。高海寧隨後入房,何依婷得知被高海寧陷害後,嬲爆爆問對方點解要呃自己,高海寧就笑住話:「你自己戇居啫」,情緒崩潰嘅何依婷就開始發爛渣,先係將雜誌揼落地,然後再反枱。喺高海寧講完「痴線」離開後,何依婷就跪低爆喊。
劇集出街後,唔少網民都認為佢啲演技唔得,及表示雖然佢不停發惡,不過表情誇張,搞到成場戲好尷尬,留言話:「演技真係用力誇張」、「何依婷演技有待進步」、「高Ling啲眼神同埋語氣直接壓住佢...完勝」、「何依婷講對白要加油」、「總覺得何唔太自然,唔夠放,搵龔嘉欣咁上下就差唔多」、「聲線同演技唔得」、「何 d 戲差到一個點」、「Eting d戲真係差d,但個樣係幾靚」、「何依婷真係惡唔起 好尷尬」、「何嬲個樣有啲怪」、「何依婷完全carry唔到呢個位」、「何依婷雖然你好正 但係你d戲好尷尬」及「何小姐啲演技睇到離哂戲」等等。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!