新聞女王｜容羨媛做訪問又炒車 口出狂言問何依婷係唔係妹仔命

由佘詩曼、馬國明及李施嬅主演嘅TVB台慶劇《新聞女王》播出以來反應熱烈，贏盡口碑和收視。為慶祝收視理想及為劇集造勢，無綫行政主席許濤、總經理曾志偉及高層樂易玲喺早前宴請劇集台前幕後人員到尖沙嘴出席慶功宴。而《娛樂新聞台》及《東張+》都有主持到場進行採訪，《東張+》主持容羨媛喺訪問期間失言，令到受訪者及場面尷尬，引起網民熱烈討論。

容羨媛喺訪問高海寧、何依婷及王敏奕時，第一句就話「恭喜各位終於有代表作啦！」，之後高海寧就甚為尷尬回應：「係呀，入行都15年啦，但係今次真係確確實實feel到自己終於有代表作，係幾感動嘅一件事嚟。」之後容羨媛就話何依婷戲中角色好慘，需要跪地之餘，劇中妹妹又慘死，並問佢：「有冇得再慘呀你？」何依婷就回答話：「仲有呀！未慘夠！呢一波都未算係最慘，之後仲有更慘嘅一波」，容羨媛就即刻衝出嚟問：「你係唔係即係妹仔命呀？」何依婷未有正面回答，尷尬笑咗一下就話：「其實曉薇都真係無辦法，因為野心好大，但係能力上或者係情緒上都有好多掣肘住」。

另外，容羨媛亦有訪問佘詩曼、何廣沛及鄧智堅，而呢個訪問都係炒晒車，佢第一句就懶係搞笑話：「Man姐你好，我可唔可以稱呼佢哋兩位為公公呢？」 呢條問題聽到佘詩曼都疑惑並問：「點解呢？」而何廣沛及鄧智堅更唔識得俾反應。容羨媛再進一步話：「佢哋兩個擺明就係公公啦！」何廣沛及鄧智堅只好尷尬回答，並自嘲係小Ivan子及李連英。容羨媛再問：「呢兩位公公服侍得你妥唔妥當？」佘詩曼就指住鄧智堅話：「大公公冇服侍過我喎，佢唔害我已經偷笑啦！」去到訪問結束前，容羨媛係咁追問要實際嘅嘢答謝觀眾，搞到何廣沛尷尬話公開同佘詩曼喺劇中嘅床照，之後佢再問幾多點公開床照，又叫佢而家就公開俾《東張西望》觀眾睇，現場氣氛一度尷尬。

其實容羨媛都唔係第一次做訪問炒晒車，喺上年佢以《東張西望》主持身份訪問蔣家旻及李成昌，期間容羨媛用超興奮嘅態度去講：「全城熱睇蔣家旻兩分鐘強姦戲！」，搞到坐喺側邊嘅蔣家旻大為尷尬，並話：「被人強姦其實都唔係好好受嘅。」除此之外，《東張西望》喺今年講到香港係全球生育率最低嘅地方，容羨媛就話：「我就已經幫香港生咗兩個小朋友出嚟㗎啦！Darren你結咗婚咁耐，我好想知道點解你咁耐都冇生小朋友呢？其實係唔係你有問題呀？」之後，表現尷尬嘅黃耀英就解釋話：「嗱嗱嗱...其實喺香港做小朋友真係一啲都唔容易㗎！又要測驗呀，考試呀，學呢樣學嗰樣......」不過容羨媛都冇放過佢，繼續發功追問：「你冇正面回應，你係唔係有問題喎！其實要check一check，身體健康緊要呀嘛！」而隔離嘅黃耀英擺出無奈表情，直至容羨媛將話題帶去另一題材，佢先鬆一口氣。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！