【新鮮感爆燈】細數ViuTV高顏值女神

近年ViuTV製作好多唔同類型真人騷、實況節目。而呢啲唔同類型嘅節目又會產生一啲唔同類型嘅新面孔，新鮮感爆燈呀！今日就同大家介紹下一班高顏值女神！

由𡃁模打出名堂但成功嘅都唔算多，陳俞希（Hailey）2009年出過寫真「八模兵團」，之後拍過電影、電視劇、DJ組合Monster Beez、甚至電台主持。最後做節目主持成功定位，而家無論旅遊節目、綜藝節目及體育節目等都駕輕就熟，2018世界盃佢以一身透視裝，戴上國旗bra成為一時話題。

除咗節目主持之外，戲劇亦培養咗唔少人才。岑樂怡（阿妹）喺電影《非同凡響》後，開始受到外界注意！但其實2015年開始佢喺now TV幕前工作。當時以主持娛樂及綜藝節目為主，然後開始拍攝劇集，好似《未來還未來》、《已讀不回》到而家播緊嘅《Reboot》等等。岑樂怡為咗段練演技，分別參加梁榮忠、彭秀慧嘅演技訓練班，仲有韋羅沙戲劇班、黃秋生/甄詠蓓戲劇班，佢真係付出唔少努力㗎！

小時候受盡歷練嘅譚凱倫（Helen），喺2016年參加ViuTV 選美節目《美選D.n.A》，因身上纹身而被稱「紋身姚子羚」。雖然十強止步，但就因而獲得ViuTV主持工作。內心馴良，外表剛強味道嘅譚凱倫假以時日，絕對係可造之才。

同樣參加ViuTV 《美選D.n.A》，決賽時表演空中絲帶舞技驚四座嘅羅伊婷（Daisy），最後得到總冠軍。又同樣地以主持節目及客串電視劇為主。但後來迷上手機遊戲之後，更組隊「狂野地西」比賽。電競活動嘅流行，正好配合佢未來嘅發展！

除咗選美型之外，知識型嘅又有喎！李昭南喺美國做過電視台主播，後來返香港發展，喺ViuTV做節目主持。睇吓佢張CV先，先來美國加州大學戴維斯分校高級榮譽文學士畢業，主修傳理，副修戲劇。而且鋼琴、 鼓、手風琴、竪琴及結他全部都識。不過以上嘅一堆資歷未必係大家最有興趣，大家可能對佢另外一個身份更加有興趣，佢就係吳浩康嘅前度。

另一個知識型嘅叫沈殷怡（Shirley），中學文憑試四科5**，攞到全額獎學金到上海復旦大學讀法律系，畢業之後再返香港讀中文大學讀法學學士。仲有鋼琴8級、雙簧管5級，兩文三語完全冇問題，之後上年加入ViuTV開始主持工作。不過係演藝事業上面尚算嫩口嘅佢，就要俾多啲時間佢啦！

如果以上類型都唔啱你口味，運動型又點睇呢？楊偲泳（Renci）係香港排球聯賽球隊匯青球員。2015年因參演JW《矛盾一生》MV演出而為人所認識。不過大家留意嘅除咗佢fit爆身材之外，同張振朗嘅緋聞就更加引人注意！