【旅遊起革命】2021旅遊趨勢預測 後疫症時代

經歷一場新冠肺炎，唔單止公共衛生上令世人反思，同時旅遊業亦係其中一個重災區，因此都需要一場大改革。2020年基本上都無望去旅遊，唔少旅行精都心癢癢，期望可以再次踏足其他地區。外國唔少網站就推測2021年後疫症時代嘅旅遊趨勢，各位可以儲定錢，搵到心水目的地，話唔定可以畀到貼士大家，希望各位2021年有個愉快旅遊經歷！

生態旅遊 不留痕跡

經歷一場傳染病之後，大家去旅行都一定會重新考慮衛生情況。2021一大旅遊趨勢絕對係生態旅遊，接觸大自然，享受有機食物，睇野生動物，環保旅遊等，唔少旅遊活動都會成為各人心水，包括單車遊、豪華露營、農莊遊覽等，各位旅客除咗享受旅遊嘅樂趣之外，亦唔希望破壞當地生態，尤其疫症過後，會更珍惜我哋嘅自然環境，因為生態旅遊絕對係重點之一。

全新航班享受 多種娛樂供應

疫症期間，坐飛機變成玩命，大家都非常擔心機上衛生。其實多間航空公司都已經宣佈，疫後航班除咗基本衛生措施會加密之外，亦會提供乘客之間社交距離，例如提供一個公共空間，乘客可以休息、飲食，甚至提供空間畀人做瑜珈、亦有小朋友遊樂場等，全部措施都係確保有一定社交距離之外，同時享受飛行過程。可以話2021年坐飛機嘅一刻，已經係享受旅行嘅開始。

工作＋·旅行 全新玩法

唔知大家聽過呢個英文「Bleisure」未呢？就係指「Business」加「Leisure」，意指工作旅遊，相信2021年會大行其道。唔少公司都開始安排一啲會議喺度假村等地方，令員工開會之後順便旅行玩樂。有公司更指明，員工可以帶同家屬一同外出工幹，對公司而言，可以提升員工對公司嘅忠誠度及滿意度，又同時令員工繼續工作，一舉兩得。對員工而，出國工幹都唔會變成苦差，隨時連工作效率都得以一同提升。

農莊旅遊 對食有要求

經歷大規模傳染病疫症後，大家對健康都有一定要求，希望可以提升個人抵抗力，飲食自然係一大幫助啦。2021年其中一個旅遊趨勢就係「Farm To Fork」，即係點？即係大家可以知道食物來源，於是乎大家就可以入住有機農場，唔單止自己摘新鮮蔬菜，仲可以自己煮自己食，連埋當地觀光旅遊，成為一條龍服務，當然亦同時響應環保旅遊呢。

火車旅遊 豪華享受

火車旅遊一直都有，不過未必個個啱，不過隨住疫症之後，火車或者會成為大家重新考慮嘅選揀，畢竟目前有唔少豪華火車遊，例如「東方快車」，可以連續幾日嘅住宿，享受車上設施等，而且火車感覺上無飛機咁密閉，隨時可以呼吸外面新鮮空氣，或者好多人去到一個國家，唔再用內陸機做接駁，有時間的話會坐火車呢。

【立即讚好】全新 Yahoo 旅遊 Facebook 專頁

Yahoo 旅遊以全新樣貌登場，Facebook 專頁當然同時煥然一新！立即讚好，每日睇盡旅遊新資訊！