雅虎香港新聞 日本十大美景你去過幾多個？
唔知大家去日本旅行鍾意咩行程呢？行到腳軟的爆買團定係欣賞大山大水的自然美景團呢？小編自己就比較鍾意影吓相，懶懶閒咁睇吓靚景，皆因香港咩都有得賣，去旅行都係想叉吓電姐！美國有線電視新聞網CNN網絡特集中，公布咗「日本最美麗的31個地點」票選，今次我地選出十個靚到爆，又唔係人人去過的私密景點，你又去過幾多個呢？！
1. 河內富士花園@福岡縣
花園面積足有 10000 平方米，種植咗超過 22 種藤花，最多人打龍的紫藤隧道，每年都會吸引不少人去影相散步，絕對係呃like的好地方。公園只於每年的 4 月下旬到 5 月下旬呢個藤花季節開放，今年啱啱過咗，下年襯早啦！
相片來源：thingsandschemes@tumblr
2. 八方池@ 長野縣
八方池位於海拔2060米，四季分明，冬天係滑雪勝地，秋天則滿山紅葉，有長野紅葉名所之稱，到咗而家呢個初夏季節，八方池嘅倒影更可以一次過睇到白馬峰雪景同綠景，感受大自然的壯觀。
相片來源：stunningjapanviews@tumblr
3. 元乃隅稲成神社@ 山口縣
面向日本海，崖上築有123座紅噹噹的鳥居，遠望仲仿如一條龍伏於山脊之上，配上旁邊藍藍的海水及超妝觀的山崖景色，即使從廣島開車三小時前往都值得。當地人相信鳥居的神靈會為佢帶來商機、漁獲豐收、航海安全，仲會有姻緣、賜子、開運除惡、交通安全同學業順利等多種願望，唔怪得咁多啦！
4. 藏王溫泉滑雪場@ 山形縣
滑雪場最獨特的自然景觀是銀樹冰原，每年12月到2月左右就會出現的。銀機冰原是由冬天的寒風吹拂，令覆蓋係樹上面的露珠所形成的樹冰，在旅遊旺季的晚上，山頂上仲會有投影燈的照射，令呢遍樹冰變得更加壯觀更有色彩。
5. 屋久島@ 鹿兒島
位於鹿兒島南方約60公里外的屋久島，搭快船大約2小時就到。宮崎駿的幽靈公主入面個片森林，正係以此為背景。不過呢到出名是個「大喊包」，在過往的降雨紀錄中，一日的降雨量就係北海道全年的降雨量，是全日本降雨量最高的地方。
相片來源：japanature2977@tumblr
6. 高谷池@ 新潟縣
除咗京都，新潟的高谷池亦係一個賞楓勝地，每年的秋天，大地就會鋪滿紅黃交錯的楓葉，景緻幽美。
7. 鳥取砂丘@ 鳥取縣
日本最大的砂丘，沙是由火山灰混合物經歷10萬年的風吹雨打而成，被強風吹出圖案有“風紋”之稱，係呢到就可以欣賞到大海同砂丘融為一體的雄偉景觀。鳥取砂丘除咗係地質公園外，入面仲可以玩沙丘越野車、滑翔傘、滑沙等。
8. 屈斜路湖@ 北海道
屈斜路湖是日本最大的天然湖泊，以前曾經因為有水怪而聞名。係屈斜路湖畔的沙地上挖一個小坑，便可以享受屬於你的私家溫泉「砂湯」，入夜後，呢到滿天星海，悠閒咁浸溫泉，就咁諗吓都覺得興奮。
相片來源： yoppy@flickr
9. 井仁棚田@ 廣島縣
日本的｢棚田｣即係梯田，呢到曾比日本農林水産省評選為「日本梯田百選」之一。每逢日落時份，梯田反映著橙紅色的「鹹蛋黃」，而每年5月上旬，鎮上村民會定期舉行種植體驗活動。
相片來源：fuckyeahjapanandkorea@tumblr
10. 白馬村@ 長野縣
呢到曾經是1998年冬季奧運會的主要場地，夏季是登山、避暑地，冬季則是滑雪勝地，滿足遊客喜好，亦可欣賞日本小城鎮的風貌。
相片來源：alientesetucorazon@tumblr
