雅虎香港新聞 日本大熱香蕉減肥法 營養師話你知點食最work！
好多女生都試過食生果瘦身，至於邊種最有效?一定有香蕉份!不過你又知唔知點樣食先啱呢?不如參考以下日本瘋傳嘅「香蕉減肥法」！
日本坊間一直都有關於香蕉減肥法嘅書籍出版，不過數到真正引起哄動，係早年由日本知名肥胖女星森公美子嘅成功例子，佢仲真人上電視現身說法，點樣用「香蕉減肥法」喺短短一個半月減7kg！由於森公美子「肥胖」形象喺日本太深入民心，所以見到佢可以短時間內減肥成功，觀眾紛紛效法。
呢個方法超簡單，早餐食1-2條香蕉，再配上一大杯常溫水，而午、晚餐就同平時一樣食。有傳連向來身形微胖嘅深田恭子，都係靠呢個方法瘦身，3個月成功減咗12kg!
——————-
點解食蕉有利減肥?由註冊營養師Gloria講你知!以一隻中型香蕉睇:
1.低卡
能量只有105千卡，係補充能量方便之選，不過留意1條中香蕉已等於2份水果，而每人每日建議進食2至3分水果，所以早餐頂多食1-2條香蕉好喇。
2.去水腫
香蕉嘅鉀質係紅蘋果嘅3倍，有助降血壓和去水腫。
3.減壓
有豐富維他命B6和鎂，有助穩定神經系統，製作血清素，舒緩壓力及緊張情緒，減肥壓力咁大，食蕉啱哂!
4.增加運動耐力
含豐富電解質，包括鉀、鎂及鈣質，同時含有豐富糖分，補充能量，提升運動能耐，食蕉同時配合攸運動，減肥效果事半功倍!
5.預防便秘
一隻香蕉含有3克纖維，比一隻生菜仲要高。腸道健康，肚腩仔自然慢慢消失啦!
——————-
生蕉好過熟蕉?
香蕉含唔同形態嘅碳水化合物，包括澱粉質、果膠、抗性澱粉、果寡糖、果糖等，隨住香蕉成熟，以上各種碳水化合物比例會有變化。Gloria表示食生香蕉更適合減磅人士，因為升糖指數較低(最低可以30)，進食後食物被消化及吸收嘅速度較慢，所以飽肚感比較持久，加上生香蕉含豐富果膠、果寡糖和抗性澱粉，係一種益生元，有助平衡腸細菌，對抗有害細菌，幫助益生菌繁殖，有益腸道健康，並減低腸癌風險。
至於出了梅花點嘅熟香蕉，因澱粉分解成果糖，會較香甜，升糖指數會上升，較快令人覺得肚餓，如果午餐忍唔住食其他高熱量食物，就得不償失喇。
係咪人人啱食蕉?
留意，唔係個個人都啱食蕉，以下幾類人士要特別注意，唔係分分鐘會有生命危險!
1.腎功能弱/腎病患者
因為患者唔可以排走鉀質，食過量會令心律不整，甚至死亡。
2. 糖尿病人士
食生香蕉好啲，因為血糖會比較平穩。不過因為一隻香蕉已經有大約3茶匙糖，一日千析唔好食超過一條，建議每次食半條好喇。
3. 腸胃易激症人士-
熟香蕉較多果糖和果寡糖，果寡糖唔可以被人體消化及吸收，進入腸道被細菌消化時會產生大量氣體，導致腹脹和腹痛，有機會令患者 腸胃不適，引起胃氣脹和胃痛。
圖片來源：TBS、ig@banana、ig@jolin_cai、ig@misselvani
更多相關文章
