明星榜樣 毫不猶豫保護Fans

近日劉嘉玲出席珠寶店開幕活動，當記者訪問完嘉玲之後，即被保安驅趕，仲蓄意噴口水去記者身上。嘉玲知道之後，即刻叫保安向記者道歉，甚有大將之風。其實，唔少明星唔止會體諒記者，仲好錫Fans添，以下就係幾個好例子：

劉德華

天王華仔一向都出哂名錫Fans，多次出手保護Fans免被保安打傷。最出名一次莫過於2007年嘅成都站巡迴演唱會，一個男Fans衝破警衛防線，走到台邊同華仔握手送花，當時十幾個保安即刻上前試圖拉走佢。華仔見到就即刻大叫佢哋「不要對我的粉絲動粗」，其後仲不顧自己由2米幾高台跳落嚟保護Fans。其實華仔平時都有好禮貌，惟有粉絲有事嘅時候先會特別激動，好似今年電影《王牌逗王牌》舉行首映禮，華仔同樣因為Fans被保安推撞，即刻上前大聲喝止。華仔咁錫同保護Fans嘅表現，唔怪得咁多年都一直受咁多Fans愛戴，呢啲先叫真正嘅天王巨星。

李光洙

因為綜藝節目《Running Man》而喺亞洲紅爆嘅李光洙，非常愛錫自己Fans。好似去年喺MAMA盛典之後搭飛機返韓國時，有多批Fans嚟送機，唔少仲上前攞簽名，光洙唔單止笑笑口為佢哋一一簽名，仲同拍緊片嘅Fans傾計。之但係佢嘅保安就對Fans態度好惡，光洙睇到之後怕保安會推跌Fans，即刻出聲話「沒關係，沒關係」，舉動貼心。而之後同樣喺香港同熊黛林拍攝節目《如果愛》時，因為吸引一大堆Fans圍觀，場面一度混亂，仲有一個女Fans不慎跌倒。而光洙一見到，即刻反射性衝上前救人，仲快手過現場其他人。所以光洙可以有咁多Fans，唔少都係因為光洙係真心愛錫Fans呢‌～

Taylor Swift

美國樂壇天后Taylor Swift雖然大家唔係留意佢新歌，就係佢嘅感情生活，但其實Taylor Swift愛護Fans嘅舉動都好值得大家讚架。Taylor Swift就算做咗天后，但依然都好親民，唔單止請Fans去佢屋企開Party、又去醫院探病咗嘅小fans、親手整餅乾畀他佢哋、又親自整咗個大禮包，入面有毛衣、枕頭仔、帽子、聖誕節小吊飾，同埋Taylor Swift親手寫嘅心意卡。早前Tayor Swift分手無耐，都出席忠實Fans新郎Max Singer嘅婚禮，因為新郎媽媽病重，惟有喺醫院畀媽媽見證佢哋成婚，Taylor Swift知道呢個故事之後，就係百密之中驚喜現身正式婚禮現場，唱歌畀佢哋聽，仲送上親手整嘅賀卡。Taylor Swift咁親民，唔怪得年年都可以保持美國樂壇天后呢個位啦‌～

圖片來源：劉嘉玲＠微博、AWC618.com、李光洙＠Instagram、Taylor Swift＠Instagram