明星足球隊黃日華發火用腳踢對家球員 靠譚詠麟安撫情緒 網民：球品咁差嘅

香港明星足球隊與貴州榕江村超聯隊上周六（11日）於香港大球場進行足球邀請賽，香港明星足球隊由譚詠麟領軍，成員包括陳百祥（阿叻）、黃日華、苗僑偉、鄧兆尊、洪天明、徐榮、戴志偉、李子雄、何家勁及已故賭王何鴻燊四房公子何猷亨，就連77歲羅家英都有份。香港明星足球隊以3比1贏過對方，不過比賽過程中就出現唔少爭議畫面，例如陳百祥於比賽期間疑用茅招伸腳阻止對手搶波，黃日華又疑似發火踢對方球員，被網民斥球品極差，甚至表示球場見人品，可見連人品都好差。

陳百祥向傳媒否認打茅波，表示佢哋踢波好斯文，年紀大伸出腳後收不及。至於黃日華就就喺比賽期間，被對手其中一名成員搶波後，再被另一名球員搶波，令黃日華跌倒在地，不過黃日華右腳落地時踢到對方球員，倒地後左腳又再伸起踢到對方背脊，對方球員及旁述都非常驚訝，結果被球證出黃牌警告。其後黃日華邊狠瞪邊走向對方，幸得其他球員上前拉開雙方及譚詠麟安撫黃日華先令佢冷靜落嚟。黃日華事後直認自己好多年無喺球場發火，但當日真係忍不住，因為對家球員一開波就剷埋身踢中佢右邊大腿，一時之間無名火起三千丈。

由於比賽為現場直播，有網民就將黃日華發火片段錄起及上載至網絡，更用上「香港明星黃日華發火甩人踢人」作標題。有網民見到黃日華跌倒在地後，對方球員有第一時間伸手扶佢，反而黃日華故意甩手，覺得佢輸唔起：「球品見人品，了解真實的一面」、「踢波又打人又踢人」、「他給別人後背一腳，還生氣兇狠，後面榕江隊員靠近他，他兇狠的甩手，太讓人惡心了」、「我就奇怪了，把人踢倒了，還甩手甩臉色，搞得是他被侵犯了一樣」、「哇，咁都得嘅！劣質藝人」、「笑死，插花呃唔到人就放軟個身瞓低」、「球品咁差嘅」、「點解唔出降龍十八掌呀」、「佢有出，推咗人兩吓」、「後尾人哋怕咗佢哋咪放水畀佢哋贏」、「如果唔係班後生仔邊有可能輸」等等。不過，都有部分網民覺得於足球場上有身體接觸係好常見：「踢足球這不正常嗎？」、「香港啲街場都係咁架啦」、「不要放大這個事情，說明香港明星隊是真的踢球，不是搞表演。比賽有點脾氣都是正常的」、「其實 體育運動有點身體接觸，有點小矛盾很正常，沒必要放大」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！