是日噏day：「傍友」的溝通藝術

呢個千古謎題，已經聽過無數咁多次。就係女方問：「佢永遠都唔明㗎囉！」
男方問：「點解我坐定定成個鐘同佢傾計，佢都唔會appreciate嘅，我唔明點解仲發返我脾氣。」

巴打，如果你唔明，你就要先回答以下的問題——「當女朋友同你分享佢日常生活上嘅牢騷，先不論邊樣麻煩啲，你覺得真心對一個女仔好，以下邊一種處理方法位置正路呢？」

A：求其hea應，同佢講你明白，希望佢開心返。
B：用心理解佢說話嘅內容，幫佢手思考，並建議有用嘅解決辦法。

有良心嘅巴打，我明白你地應該會揀B係咪？認為咁樣先係對女朋友／太太好。但其實選擇B，絕對係大錯特錯嘅做法。

呢個係基於男性同女性，思維模式不同嘅原因。作為男人，天生就係鍾意解決問題嘅物種。一班兄弟坐埋傾計，就係要討論解決問題嘅可行方法，不是純粹的廢up。

但係女士對住伴侶，第一時間需要嘅，往往唔係實際嘅解決方法。佢需要嘅，係一個理解佢感受，俾佢呻嘅「傍友」。

唔係話女人永遠都唔理性，唔係話佢哋永遠都只停留喺廢up嘅層面。而係當女性係生活上遇到委屈嘅時候，對住朋友又或者陌生人，佢哋反為會同佢哋理性討論，但實際上佢哋最想做嘅，係大叫一聲：「我好唔開心呀！」然後有條友，唔理三七廿一，都同佢講佢明白佢感受。

而所謂嘅「傍友」，根據《中華語文知識庫》網站嘅定義，意思係——釋義：趨炎附勢的人；拍馬屁的人。

用人話講，就係過往港產片入面，陳百祥之類嘅垃圾角色（嗱，我指角色咋吓），守喺主角側跟做傍友，盲目附和，咩都話啱高呼「你地無做錯到！」嘅一類角色。

而我見過，我真係見過，所謂的終極傍友技倆，係從事金融業界嘅朋友A。朋友A人緣極好，皆因佢有一項必殺技。同朋友傾計，佢永遠唔會表達自己意見，而係將對方講嘅內容，用歸納sum up嘅方式，換咗中間嘅用詞，然後再重複一次出嚟：「你意思係咩咩咩啊嘛，係咪？」再補多句：「我明啊！啱啊！」

過程從頭到尾，同冇講過嘢，根本冇分別。但正正係呢一種技巧，令人覺得同佢傾計好舒服，好有認同感。而伴侶好多時第一時要需要嘅，就係咁之嘛！

去到最尾，唔係要鼓勵大家對住女朋友，永遠只停留喺「傍友」嘅層面。只係希望大家係面對呢啲情況嘅時候，第一時間唔好用錯方法，急於展示自己解決問題有幾叻。反為應該先處理咗伴侶感受上嘅需要，理性實際嘅分析，可以稍後再講。咁佢就聽，都聽得入耳啲啦，係咪？

text / Tyler Li