雅虎香港新聞 是日噏day：【有片】陰道練功夫 真係有助魚水歡？
早前有報道，加拿大有一名叫Kim嘅女士，推廣一種稱為「陰道功夫」嘅女性陰道舉重運動。打開YouTube訪問影片，作為男性觀眾，驚嚇程度直逼恐懼鬥室，但係本著求知同埋科學精神，就算一邊睇一邊硬係錯覺有D陰陰痛縮下縮下，我都決定要睇到最尾一秒，同大家「了解返介紹返」。
呢種「陰道功夫」運動，據創辦人Kim所講，主要係運用一粒鵝蛋形嘅玉石，放置喺陰道入面，透過收緊陰道肌肉，作強度訓練。除咗將玉石放人陰道作練習之外，仲可以喺玉石上綁一條繩，繩嘅另一端再綁上負重物。例如佢就將以下呢啲物件綁過上去，仲係世界各地唔同地方拍照留念，以推廣「陰道功夫」呢種運動。物件包括：啞鈴、衝浪板、香蕉、椰子、冬甩、貝殼，以及金像獎等（嗯，我都唔知點解係金像獎……）
(from @kimanami instagram)
究竟無情情，點解要用陰道黎舉重呢？純粹為咗嘩眾取寵，貪得意？Kim解釋，除咗大家好容易諗到嘅原因（增進魚水之歡嘅情趣）外，練習陰道舉重仲可以防止陰道肌肉鬆弛、增強骨盆區強度、預防與當失禁問題等。片段入面就請來婦產科醫生Stephen A Rabin，證明左呢一個說法係有根有據嘅。
呢個「陰道舉重」運動，同大家係港產電影笑點裏面見到男性同陰莖負重舉重，有異曲同工之妙。當中嘅笑點，背後就係笑緊男人成日以為「硬」同「勁」就是王道，練到好似武器一樣就係地上最強。所以點解好多年前一單新聞講述有男人會喺沙灘插沙，大家會捧腹大笑嘅原因。
如果進行呢種陰道訓練純粹係為健康，希望訓練骨盆強度以及預防失禁問題，當然贊成；但如果係為咗增加床上嘅樂趣，就同男人練插沙一樣，絕對令人有保留。
試諗下男士如果擁有練到好似武器咁具攻擊性嘅下體，作為女性心理上會唔會覺得舒服呢？同理，將陰道訓練到好似奪命鉸剪腳一樣，只會令男人諗起血盆大口嘅恐怖cult片，心理上輸咗，分分鐘會「抬唔起頭」。硬件上贏咗，但係軟件就輸晒，又何來樂趣可言？
正如Kim係片段最後一句所講，佢識得一位喺泰國有訓練陰道肌肉嘅女士，因為肌肉力度控制不善令三位男士要入院治理，你話係咪嚇死人先？
溫馨提示：有意作陰道肌肉訓練嘅朋友，請先徵詢家庭醫生建議。
text / Tyler Li
