【曾偉權病逝】曾與梅小惠相戀13年 大馬女星介入致分手 近年與契妹出雙入對

曾偉權最為人記得嘅，可能係同梅小惠嘅一段愛情長跑，但係因為有第三者而告終。近年曾偉權同任職鋼琴教師嘅契妹SaSa關係密切，但係權哥一再強調佢地唔係情侶。

1982年仲讀緊亞視前身麗的藝訓班嘅時候，曾偉權同同學楊雅潔拍拖，但係3年後分手。1986年，電視台監製梅小青搵曾偉權拍賀歲作品《滿堂紅》，因而認識梅小青胞妹梅小惠，二人墮入愛河，成為圈中模範情侶，並且有結婚打算，但係拍拖多年後思想開始有分歧，曾偉權想為事業拼搏，梅小惠想建立家庭，並且繼續留喺TVB。後來曾偉權去馬來西亞發展，因而結識當地女歌手葉麗儀，並且傳出緋聞。梅小惠當時仲為曾偉權向傳媒解畫，但最終都係分手收場。曾偉權同葉麗儀交往3年，因為相隔兩地難以維繫感情而分開。

曾偉權因為被指拋棄梅小惠而形象插水，近年接受訪問時權哥表示對小惠有歉意，覺得蹉跎對方歲月，但係回想如果真係同小惠結婚，對雙方都未必係好事。而梅小惠提及因為呢段關係，唔會再為伴侶死心塌地，又話情變事小，遺憾一世人只係拍過一次拖。

同葉麗儀分開之後，曾偉權獨身多年，2011年喺網上因為討論養狗問題而結識網友SaSa，二人一見如故，SaSa照顧曾偉權起居飲食，曾偉權亦打本開琴行俾SaSa教琴，關係非比尋常，但權哥強調唔係拍拖，自己當SaSa係細妹，又自言唔懂得處理愛情。曾偉權傳出患癌之後，有傳媒影到SaSa揸車接送曾偉權，而SaSa嘅微博本來有好多同曾偉權出相入對嘅生活照，喺傳出權哥病重之後已經剷走晒。