最愛還是你？食回頭草嘅3對明星

「分手後一分鐘，便有後悔聲音⋯⋯」上月吳若希先高調同有錢仔Alex分手，近排就傳佢哋復合；「十優港姐」麥明詩之前先喊爆話分手，近日就被人影到佢揸林作架車疑似復合。娛樂圈離離合合真係見怪不怪，不過係咪復合就一定可以走到最尾呢？咁就要睇吓以下3對明星嘅例子啦：

「翻撻」成功組：

鄭秀文＆許志安

佢哋呢Pair經過20幾年嘅分分合合，兜兜轉轉先拉埋天窗。許志安同鄭秀文（Sammi）1991年合唱一首《其實你心裡有沒有我》傳出緋聞，之後就真係開始拍拖，兩人感情一直好穩定。最經典莫過於2002年，兩人一齊奪得《勁歌金曲》最受歡迎男女歌手獎，許志安仲即場發表「廚房愛的宣言」，Sweet到爆。不過2004年兩人竟然分手，之後Sammi患上抑鬱，而許志安先後同助手潘恆章、模特兒余德琳(Michelle)拍拖都以分手收場。但無論係粉絲定係傳媒，都一致覺得Sammi同許志安會復合。隨住Sammi信教兼強勢回歸，許志安同Sammi互動變得頻繁，呢對金童玉女分手7年終於宣布復合，仲喺2013年結埋婚添，唔少Fans都紛紛戥佢哋開心呢～

吳雨霏＆洪立熙（Brian）

由女子組合Cookies出道嘅吳雨霏（Kary），大家通常都只係注意佢嘅唱功多過感情事，而最令人熟悉嘅一段情莫過於同余文樂拍拖啦。但其實同余文樂拍拖之前，Kary一直有個青梅竹馬嘅男朋友洪立熙（Brian）。佢哋十幾歲就一齊拍拖，同余文樂拍拖之前Kary先同Brian第二次分手。而同余文樂朋友變情人短短幾個月就分手，點知轉頭Kary又極速同返Brian一齊。三度復合嘅Kary同Brian，最終都認定彼此係終生伴侶，2015年7月去咗意大利結婚。結咗婚之後不時喺社交網站大曬恩愛，今年年中Kary仲暫別樂壇話想做一個好太太嘅角色，唔知係咪將會有另一個好消息呢？青梅竹馬這些機會，小編都想有呀，嗚⋯⋯

「翻撻」又分手：

謝霆鋒＆張栢芝

謝霆鋒同張栢芝嘅離合真係好似睇緊戲咁。謝霆鋒作為著名影星謝賢同狄波拉個仔，當然必定成為傳媒追訪對象，所以當年王菲拖謝霆鋒出嚟嗰吓，真係全城譁然。不過，後生嘅霆鋒又點會咁快定到落嚟？2002年頂包案事件順便踢爆埋謝霆鋒同張栢芝嘅戀情，而同時謝霆鋒亦都話已經同王菲分手。點知霆鋒同栢芝轉個頭又分手，霆鋒再同返理王菲一齊，但無耐又散咗。嘩，你哋啲戀情快來快去到咁？

最後王菲嫁咗李亞鵬，而謝霆鋒同張栢芝2004年拍電影《無極》舊情復熾，到最後2006年更加喺菲律賓閃電結婚，然後就生咗可愛嘅大仔Locus，一家三口溫馨到爆。雖然之後2008年爆出豔照事件，但係謝霆鋒當時話一定會同栢芝走落去，2010年細仔Quintus出世，2011年謝霆鋒奪得金像獎最住男主角時栢芝仲感動落淚，個陣都以為佢哋應該真係會一齊一世。點知轉個頭佢地共同發聲明話離婚，之後雖然不斷有傳復婚消息，但最後謝霆鋒都係同返王菲一齊。所以，復合都唔一定等於最愛係你先回頭，可能係因為得唔到佢嘅最愛先同你一齊⋯⋯

圖片來源：吳若希＠Facebook、吳雨霏 Kary Ng@Facebook、電影《老夫子2001》、許願＠微博、BoNe12321@微博