《有一種女仔，只係當愛情係工具》

近排每日都畀嗰個「有樓就有高潮」嘅港女洗版，大家都好似好震驚世上竟有咁現實嘅女人，就算呢個女仔係為咗上位先講又好，真心又好，但其實呢種女人一向都喺我哋身邊存在㗎！

有一種女人佢一早就知道自己需要麵包，呢種人目標為本，揀親嘅男人都係非富則貴，因為呢種人最清楚愛情只係一種工具，佢哋唔需要不設實際嘅愛情，只需要可以飽肚嘅麵包。

我以前有個女同學，佢真係自小家貧，住公屋，爸爸拎綜援⋯以前佢一早已經話自己將來要搵個有錢男人，既然無信心靠自己可以改變命運，佢選擇用愛情去換一個改變命運嘅可能，因為喺佢記憶中，搵唔到真愛唔苦，捱窮先係最苦。

或者有人會鬧呢種女人賤，但其實只係一種明賣明買嘅關係，佢用愛情去換麵包，又有男人肯用麵包去換「愛情」，某程度上都係一種各取所需嘅關係，why not?

呢個社會笑貧不笑娼，雖然我哋唔會明白呢種人點解會咁做，但係其實關我哋咩事？正如有人會為錢去出賣人去踩住別人上位，有人會為錢去出賣靈魂，講到尾呢啲都係一場交易，買同賣嗰個開心滿足，咪得囉。