5大本地梳乎厘Pancake推介 金箔Nutella、炙燒焦糖布甸口味

食梳乎厘Pancake喺香港選擇有好多，例如有唔少日本過江龍名店都登陸咗香港～不過其實有好多本地嘅餐廳、cafe或甜品店都有出色嘅梳乎厘Pancake，口味仲好獨特添，甜品控一齊睇吓仲有邊間你未食過？

法國藍帶廚師主理多口味梳乎厘Pancake TERA

日式木系茶室風格，畀到一個簡樸而寧靜嘅環境畀大家chill吓～餐廳由曾到法國藍帶深造嘅廚師主理，主打唔同口味嘅日式梳乎厘pancake、甜品同輕食。佢哋嘅梳乎厘pancake真係款款都咁吸引呀，如每日限定嘅招牌金箔Nutella，鬆軟嘅班戟上加上Nutella醬、金莎朱古力脆脆同金箔，香甜之餘又有脆脆口感，打卡都好啱。另外宇治抺茶同榛子焙茶都一樣咁好味㗎，前者加入煙韌嘅蕨餅、白玉同紅豆蓉同抺茶忌廉，抺茶香濃回甘，後者就加咗焙茶牛乳布甸同榛子脆脆，個布甸牛乳味好香濃。

黑森林梳乎厘班戟 Black Coffee

以型格嘅黑色為主調，連餐具同埋嘢食都係以黑色為主！呢款Black Forest Soufflé Pancakes係人氣甜品，以經典黑森林蛋糕為靈感，原味梳乎厘班戟上面加上朱古力慕斯、朱古力片、酒浸車厘子等，可可香氣好突出，而班戟富空氣感同時仍然保持到應有口感，唔會好似食咗空氣落肚咁～想食清新口味呢款香橙片日式梳乎厘鬆餅都唔錯，食到啖啖橙香味，一啲都唔膩！

炙燒焦糖布甸梳厘班戟 有料案內所

屯門一間甜品小店，炙燒焦糖布甸梳乎厘班戟質感好軟綿，一入口係空氣感然後蛋香好突出，加上炙燒焦糖喺面，一脆一軟，就好似焦糖布甸咁。Pancake會配埋一球雪糕，一冷一熱令成個甜品配搭更有層次感。另外仲有Oreo流心朱古力、伯爵茶同Tiramisu等口味添。

西貢性價比高小店 The Hut

今年新開位於西貢嘅小店，主打各款即製梳乎厘班戟，好多出面食唔到嘅口味～推介必食嘅招牌Honeycomb，蜂蜜味道甘香清甜，加埋面頭嘅焦糖脆脆，食落更有層次，Cream都打得好幼滑，成個pancake畀人嘅感覺都好輕盈。Tiramisu口味嘅咖啡味香濃，酒量適中。最重要係全部pancake嘅價錢都係五十蚊左右，CP值好高！

特濃吉士焦糖梳乎厘班戟 Four O Five Coffee & Eatery

觀塘工廈內嘅一間小店，一樣有供應唔同口味嘅梳乎厘班戟～最吸引係特濃吉士焦糖梳乎厘班戟，梳乎厘厚實得嚟好fluffy，而且充滿蛋香，一切開吉士醬流晒落嚟好治癒呀！吉士醬同pancake都唔會過甜，加埋上面一層薄薄嘅焦糖甜度啱啱好，另外仲有啲爆谷同nuts點綴，幾有驚喜。

文: Yanica