朱慧敏與醫生老公造人成功 低調懷孕8個月

現年42歲嘅朱慧敏，2021年與醫生陳良貴註冊結婚，覓得好歸宿，婚後減少幕前工作，轉型做KOL，不時孖住老公喺社交網站開live，與網民分享醫學資訊。最近幾個月朱慧敏同老公暫停咗直播，原來佢哋造人成功，而家唔聲唔聲已經懷孕8個月，真係恭喜晒呀！

有傳媒報道朱慧敏已經懷孕8個月，BB嘅預產期就係今年11月。佢喺接受傳媒訪問時指自己喺30幾歲開始做身體檢查，而老公亦有做精子及生殖系統嘅檢查，婚後同老公都有生BB嘅共識。雖然佢哋都有開live，不過務求生BB嘅過程可以順利啲，佢定期每一至兩個月做腰椎、骨椎和盆骨產前護理，不過最重要都係要做暖宮保養。

朱慧敏仲講到而家佢每日起身都會同BB講早晨，而佢都感覺到BB嘅郁動，呢個感覺好神奇。另外，BB喺照超聲波時見到BB腿長似足媽媽，佢仲竟然擺出唔同甫士，所以朱慧敏都話BB好似做緊瑜珈。

至於BB叫咩名？由於2018年陳良貴曾為林盛斌（阿Bob）做「通波仔」手術，其後Bob上載二人合照答謝及公開為佢徵女友，而Bob亦講得出做得到，成功撮合佢哋！有見及此，朱慧敏就建議BB個名中有個「心」字，之後兩公婆開始打情罵俏，老公提議叫「心動」，老婆就搞笑話叫「心跳」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！