李海生逝世︳《愛．回家》申叔受細菌感染離世 享年83歲

曾效力TVB多年嘅資深演員李海生逝世，享年83歲。有報導指，李海生因為背脊生瘡而令皮膚潰爛，後來更受細菌感染，最終於尋日離世。

李海生年青時曾經係健美先生，更參加過1963年嘅「香港先生競選」。後來李海生轉為學習詠春，同狄龍係同門師兄弟，70年代加入邵氏擔任動作演員及武指，拍過多套電影，包括《少林三十六房》、《A計劃》及《龍的心》等。

八十年代李海生轉投電視圈，因為武打演員出身加上光頭造型，故不時被安排演高僧，或者係惡形惡相嘅江湖人馬。近年李海生最為人認識作品有《愛．回家之開心速遞》中飾演接龍集團保安員「申叔」，劇中佢同清潔部頌姐（劉桂芳飾）有段搞笑黃昏戀，相當搶鏡。另外，2020年嘅《降魔的2.0》，李海生飾演孤獨老人，劇中同流浪狗相依為命，同樣令人動容。

李海生晚年時仍繼續拍劇、教詠春，2018年獲香港動作特技演員公會頒發「傑出貢獻大獎」。去年12月李海生離開TVB退休，佢喺《愛．回家之開心速遞》嘅戲份亦逐漸消失。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！