李龍基未婚妻「人民幣磚」塞名牌袋：你的努力耕耘

72歲李龍基與年輕36歲的女友Chris Wong打得火熱，兩人關係已經昇華做未婚夫妻，而身為圈中隱形富豪嘅李龍基，就有指佢準備立平安紙，將中港兩地共7個物業轉畀Chris，保障未婚妻將來生活無憂。未來老公咁錫自己，Chris亦好識做，最近就做「跟得夫人」跟住飛泰國撐李龍基嘅舞台劇演出，又晒沙巴旅行相、入住有私人泳池嘅獨立屋等，生活奢華。原來咁都未算，前日（7日）佢再高調炫富，將「人民幣磚」塞入名牌手袋，見佢一磚接一磚咁塞滿都未裝完，轉頭再塞入另一個豪華包包，誇張程度令人乍舌，目測有近數十萬港元嘅鈔票，佢又興奮留言：「我每個包包的都願意把所有位置，毫無保留留給你」、「你的努力耕耘，我不介意把手袋的空間，全部騰出來給你塞滿」睇嚟李龍基「寵妻」無極限，收入全數「上繳」準李太。