東張西望丨李旻芳採訪元嶺村居民過路費糾紛 攝製組遭大漢恐嚇 網民：堅係勇

【4月29日更新《東張》澄清內容】

TVB資訊節目《東張西望》近年報導唔少社會時事及民生議題等議題，最近佢哋就報道大埔元嶺村嘅過路費糾紛事件，結果引起大眾關注。

村屋業主陳太太喺2018年購入該單位，當時律師、地產及前業主都冇提及有「過路費」，不過喺入住幾個月後突然被要求收取。於是陳太太翻查地契並得知問佢收取「過路費」嘅李先生根本唔係業權人，所以陳太太一家拒絕付款。去到2020年，小路不斷被鐵柱及鐵枝等阻路，喺今年1月小路仲被裝上有鎖嘅鐵閘。而《東張西望》女主持李旻芳就意圖採訪涉事嘅李先生，但遭對方拒絕。其後佢就問坐喺附近士多嘅街坊意見，不過估唔到幾位大漢突然出言恐嚇兼用手扯住攝影機，最後需要報警處理。警察到達後只係話係一個爭持狀態，及話：「如果你話係明顯搶嘅舉動，老實講就五十五十啦！呢部你公司財物，你一定需要保護啦！」之後有男士突然恐嚇話：「細佬，我唔知你邊度，溶咗你都仲得呀！我溶咗你得唔得？」，過程中警方拘捕一名因涉刑事毀壞嘅男士，及勸送《東張》採訪隊離開現場。

《東張》事後一度更新事件指，「就昨天大埔元嶺村的報道，引起咗好多觀眾以及網民熱烈討論，我們留意中間有點誤會，以為現場處理的警察無即時採取行動。」《東張》作特別澄清，指當日報警後，到場軍裝警察作初步了解後，已在現場即時以「刑事毀壞」拘捕一名52歲男子，帶返警署，交給刑事調查隊處理，相關案件仍然調查中。

節目出街後，事件隨即引起大眾高度關注，唔少網民仲紛紛留言討論，大讚《東張》勇敢：「東張女主持正義得多！勇者無懼！Proud of you！支持！……除良安暴！治安好呀」、「東張好勇，加油」、「女主持算好勇」、「可以惡到咁,無法無天,支持東張西望」、「今次好波！堅係勇」及「東張西望仝人，全港市民支持您們！！！」等等。另外，事件亦令網民喺討論區瘋狂討論，例如：「太恐怖！原來香港噤（咁）文明嘅城市都可以噤（咁）無法無天。警察都冇辧法？！」、「阿sir 個處理方式，好笑」、「住村屋都係麻鬼煩」、「咁鬼寸,開佢樣啦,仲幫佢打乜格仔呀」及「個兩個報料肯定比人搞」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！