東張西望｜老鼠屋散發惡臭鄰居極困擾 江美儀出馬成功游說住戶清理雜物

TVB資訊節目《東張西望》日前（29日）報導黃大仙東頭邨一個單位驚變老鼠屋，該單位屋主家中堆滿雜物，衛生情況惡劣，不但有大量老鼠，更傳出陣陣臭味，令同層住戶感到困擾。由於老鼠屋住戶長期唔關門，為避免老鼠入屋及阻隔臭味，鄰居們都做好防禦措施，包括安裝鐵絲網、貼膠紙。《東張西望》節目組到訪老鼠屋希望可以勸籲該住戶清理雜物，住戶起初相當抗拒，最後由視后江美儀與義工隊成功游說住戶。

《東張西望》主持廖倬竩到訪老鼠屋單位，甫出升降機就聞到一陣臭味：「最明顯係尿臊味，但我懷疑仲有一啲老鼠屍體味道，同埋食物腐爛嘅味道，真係好難聞，想嘔咁滯。」老鼠屋單位無鐵閘，大門虛掩，門口掛滿一袋二袋，仲有一架擺滿雜物嘅手拉車，屋內雜物堆中更有鑽來鑽去嘅老鼠兵團。主持廖倬竩嘗試與女住戶對話，住戶表示正清理家中雜物，指由於無關門，有啲老鼠由外面走入屋。當聽到廖倬話佢好多年無清垃圾後，住戶否認係垃圾：「唔係垃圾啊，係我雜物多。」講講吓，住戶唔太耐煩，表示會自己清理雜物：「你唔好理我喺邊到瞓啦，得啦，可唔可以離開啊？唔該你哋！」

由於對同層住戶造成極大困擾，《東張西望》決定邀請義工隊幫忙游說該住戶，包括義工成員江美儀。江美儀一見到老鼠屋女住戶出現，即向佢表示有嘢想送畀佢，該住戶拒絕：「唔洗啦，你放喺屋到，老鼠都會咬爛，唔洗啦真係。所有嘢點解放喺出面？放低少少麵包，佢（老鼠）就叼走咗，一係就咬爛啲嘢，都唔知佢哋點嚟，已經關咗防煙門，佢都係走上嚟，我都唔明啊。」游說期間，有街坊經過開口投訴，江美儀和其他義工安撫街坊，並努力游說住戶清理雜物，住戶態度明顯軟愈化。經過多番協調，義工隊喺食環署職員協助下，清理咗40桶雜物及捉走42隻老鼠。義工隊讚揚江美儀：「佢幫我哋同住戶傾咗好多，開解咗佢（住戶），令我哋好順暢咁可以做晒所有要做嘅嘢。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！