東張西望｜聾啞女子美華被保安佔樓露宿走廊 TVB跟進獲派同區公屋後最新發展

無綫資訊節目《東張西望》一向緊貼追蹤社會時事及民生議題，去年曾報道聾啞女子美華被女保安阿娟霸佔屋企並趕出單位一事，引起極大迴響。美華曾出資10萬畀父親買下李鄭屋邨公屋單位，但父親就喺死前21天突然改遺囑，將該單位畀咗女保安蕭榮娟；之後美華就被阿娟趕離單位，只能露宿走廊。

經過《東張西望》報道後，阿娟喺去年11月態度180度轉變，不但準備大量美食煮畀美華、交還鎖匙，又跪求美華原諒，希望佢搬返嚟同住，又指會當佢係妹妹；但當被問到會否交還業權時，佢就表示代付咗殮葬費，而美華爸爸已立咗遺囑，所以覺得間屋係佢自己既。美華就喺12月入稟高等法院希望取回業權，並要求法庭頒令禁制阿娟唔可以阻礙佢享用該單位；另外，美華透過「體恤安置」計劃向房屋署申請公屋，12月已獲安排同區一人單位。

《東張西望》當時亦有陪同美華返李鄭屋邨居所收拾物品，又為佢添置日用品，不過美華表示只係暫住，都係想快啲搬返去舊屋。《東張西望》亦指美華已簽署一份由社會福利署幫佢追討物業權益嘅法律援助申請同意書；一班網民表示見到美華宜家有瓦遮頭感到欣慰，但亦指好難證明到美華當年嗰10萬係畀咗佢爸爸買樓，唔知幾時先拎得返個業權咁話。而一直都有追蹤事件嘅《東張西望》亦將於今晚（31日）再次報道美華近況，預告指佢獲得分配公屋，而《東張西望》團隊與義工疫下送暖，報道美華近況及見證佢嘅轉變。唔知會唔會有好消息呢？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！