人氣日本牛丼店插旗佐敦 香港升級做100%牛肉漢堡扒

日本三大平民牛丼之一嘅松屋，將於8月11日正式登港喇！品牌嘅海外店唔係區區都由日本直營，但香港就得到呢份榮幸，而香港社長浜野先生更想帶領香港店做出超越日本嘅質素𠻹，即睇香港店有咩大不同啦～

皇牌牛肉飯5種分量$29起

香港餐牌同日本基本無異，所有牛肉相關菜式亦同樣選用北美產穀飼牛肉，而唔同部位配合唔同切肉方向，口感亦有所唔同。好似牛肉飯嘅牛肉堅持每塊切成1.1毫米厚度，以保持軟腍口感，煮得入味又唔會老身。

店經理Ron表示，品牌自家秘製嘅牛肉飯醬汁不斷改良至第33代，為嘅係配合時代口味演變，現時配方偏濃味，但唔排除會按香港口味再作調整。開飯仔試過都覺得好夠味，加少少七味粉就更有層次。

另外Ron私心喜愛，亦係人氣款式之一嘅燒牛五花，牛肉切得厚啲，比較有口感，但咪畀「五花」呢個字呃咗，食落唔會好肥膩；加上牛肉喺日本醃好再直運到港，確保味道同日本一樣。

餐廳提供多款醬汁同調味料，其中黑色蓋嘅3款都啱配燒牛肉；建議先試原味，再淋較濃味嘅甜燒肉醬，其次係BBQ醬，最後就係解膩嘅柚子醋。

香港升級100%牛肉漢堡扒

品牌主打牛肉飯外，仲有咖喱同定食系列，因為想照顧上班族需要飽腹感嘅親民價正餐。而嚟到香港，漢堡咖喱飯嘅漢堡扒，就由日本嘅1:1牛、豚比例，升級為100%牛肉！所以口感同當地有所唔同，香軟之餘好juicy。咖喱汁底則同平時嘅日式咖喱相比辣少少，而且加入牛肉末，味道同口感更有層次。

小菜方面有多款選擇，由$6至$30不等，如日本運港嘅清甜山藥泥、配合香港風格嘅油菜、傳統納豆、燒三文魚等等，有成廿款選擇㗎。

松屋
地址: 佐敦彌敦道219號莊士倫敦廣場地下G06-09號舖

文：Cathy
相：Yan Yan