林欣彤被狗扯落樓梯 仆崩下巴險毀容

·2 分鐘文章
林欣彤指愛犬「飛飛」每次出街都很百厭,一定要金睛火眼望到實。
林欣彤指愛犬「飛飛」每次出街都很百厭,一定要金睛火眼望到實。

歌手林欣彤遭愛犬拉扯,仆落樓梯,大字形趴在地上後暈倒,父親火速將她送往醫院急症室治療。身上多處損傷的她,下巴更撼落地險毀容,罪魁禍首的狗狗毫無悔意,教她這個狗奴才又愛又嬲!

林欣彤飼養了2隻愛犬,前晚她如常用狗繩拖愛犬「飛飛」去街,怎料「飛飛」突然狂跑,將她整個人扯落樓梯!昨日她透過短訊回覆:「都冇諗過咁嚴重,我暈咗趴喺地下幾分鐘郁唔到,聲都出唔到,好彩尋晚爸爸陪我放狗。」其手掌、膝蓋都擦損,最嚴重是下巴撼落地,險些毀容,她說:「個傷口唔細,好彩有個口罩隔一隔,醫生檢查過啲骨話冇事,但牙骹韌帶傷咗,有少少合唔埋個口,講嘢同吞口水都好痛。」

暫時不能唱歌

她在社交網報平案,指因傷口痛楚,暫時不能唱歌:「咬唔到嘢,又唔係好行到路,就當個天安排我放假啦。」自嘲論盡的她似預計終有一日放狗會跌親:「我成日都危危乎,但冇諗過可以跌成咁,好番之後我要操得大隻啲!強壯啲!」並感謝大家問候,令她覺得好溫暖,亦感謝隔空幫忙的朋友,覺得自己好幸福。最後特別多謝父親及弟弟陪她到醫院,而媽咪就為她煲粥。

「養狗係咁」

她形容「飛飛」每次出街都好曳,尤其見到其他狗會發狂,並指愛犬毫無悔意:「佢完全唔知發生咩事!(有冇呵番你?)冇。(你會怪佢?)唉,嬲一陣囉!都冇得怪佢,佢都唔知會令我咁嘅,養狗就係咁。」

除了下巴受傷,林欣彤的手腳亦擦損。
除了下巴受傷,林欣彤的手腳亦擦損。
林欣彤感激弟弟陪伴到醫院。
林欣彤感激弟弟陪伴到醫院。