林正峰為TVB拍大灣區宣傳片 被網民嫌未夠班
現年29歲嘅林正峰憑J2節目《#後生仔傾吓偈》出身,近年演出機會多多,除咗主持及司儀工作,仲有參與唔少劇集拍攝,喺上年台慶劇《新聞女王》中與當家花旦高海寧成為一對。另外,佢成功入圍《萬千星輝頒獎典禮2023》「飛躍進步男藝員」最後5強及「最佳男主持」最後10強,上位在望。近日TVB趁住《新聞女王》嘅熱度,搵咗林正峰以劇中形象拍TVB大灣區廣告宣傳片,不過一班網民就認為佢未夠班。
林正峰成功憑《新聞女王》飾演男主播王偉喺內地人氣急升,TVB就搵佢夥拍「飛爺」鄧智堅及王嘉慧拍攝TVB大灣區廣告,宣傳片一共有5集,仲安排喺黃金時段播出。不過廣告出街後,唔少網民都認為佢未夠班,留言話「馬國明、何廣沛都唔用」、「大灣區方案但係唔搵大灣區視帝係咩玩法」、「點解TVB仲要力捧一個冇觀眾緣既人,唔係整容,整白塊面就可以入屋」 、「新年流流 吾(唔)想見到個怪樣」及「TVB大灣區計畫, 比佢攪灣晒」等等。
另外,初出道嘅林正峰,喺《#後生仔傾吓偈》以單眼皮加圓框眼鏡示人,不過佢嘅外貌不斷進化,前年年尾為劇集《有種好男人》宣傳活動擔任主持,當時以MIRROR成員Anson Lo(盧瀚霆)同款髮型「心形瀏海」現身,仲有有認錯佢做Anson Lo。另外,佢仲由單眼皮變雙眼皮,鼻子變得高挺,成個韓國oppa咁樣,結果引起網民討論,兼惹嚟整容疑雲。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!