雅虎香港新聞 回歸26年｜見證公民黨興衰黨友聚散 創黨成員查錫我：為理想盡心盡力 問心無愧
【Yahoo 新聞報道｜回歸26年專訪】2023 年 6 月，香港快將回歸 26 年，公民黨宣佈清盤。創黨成員查錫我在最後一次黨員會議，親手投票支持清盤決定。17 年歷史的公民黨，在民情洶湧中冒起，在萬瀨俱寂中消亡。74 歲的查老接受《Yahoo 新聞》專訪時談到亡黨，一臉坦然，「我哋個黨，絕對係問心無愧」。談起香港在法治方面經歷的挑戰，本身是大律師、曾任職廉政公署的查老則非常肉緊。回歸以來法律界五度發起黑衣遊行，他從不缺席，「任何人破壞法治精神，絕對唔係愛國，係違背香港同國家利益」。
「香港被英國人搶走」
查錫我稱從小接受「愛國教育」，被灌輸「香港被英國人搶走」的觀念，「香港回歸中國，我覺得無問題」；加上當年有《基本法》、《中英聯合聲明》等文件安定人心。現時回望，查錫我就引用鄧小平曾接見的政治家鍾士元爵士所說，未知香港未到 50 年會否已經改變，「依家睇返轉頭，我都不得不承認鍾士元非常有遠見，好似一個水晶球咁」。
1999 年起，香港經歷六次釋法，當中涉及政制改革、對外事務、立會選舉及國家安全等。查錫我認為，雖然中央確是有權釋法，「但應該盡量壓低個意欲，唔好咁做，做得太過頻密，信心會動搖」。國內法制與香港不同，既然香港設終審法院，「盡可能香港嘅事務由香港去解決」。
「我哋個黨，絕對係問心無愧」
2003 年，港府官員被指處理沙士事件失職，加上 23 條立法，觸發 50 萬人大遊行。反 23 條法律界人士後來組成「45 條關注組」，翌年派余若薇等四人參選立法會，全部當選。2006 年關注組成立公民黨，查錫我獲邀加入。
在公民黨創黨時期的照片中，查錫我站在首任黨主席關信基教授、黨魁余若薇的背後，附近還有毛孟靜、吳靄儀和譚香文等人。「當年我哋創黨都係有一番理想，初心係改善到香港民生、同推動民主進程」。17 年後的今天，查老依然無悔，「我哋個黨，絕對係問心無愧，個個人都係盡心盡力就住理想同目標去做」。
「無論咩人想做特首，都應該要有個辯論」
查老憶述，公民黨成立的目標是成為執政黨，「唔係話要推翻共產黨，而係想有多啲話語權，喺政策制定嘅時候，更加有利整個社會」。創黨那年，該黨時任立法會議員梁家傑決定參選特首，是首次由民間自發推薦候選人。查老笑說：「我哋都唔係細路仔嚟嘅，都知道無可能當選」，派梁參選是希望加強港人的民主意識，「將來無論咩人想做特首，都應該要有個辯論。無論個競爭係點都好，都要有個競爭」。雖然梁最終落敗，「喺某個角度嚟講，都推進咗民主進程」。
面對釋法及政制等爭議，法律界曾 5 度發起黑衣遊行抗議，包括 1999 年起多次釋法、2014 年一國兩制白皮書以及 2019 年逃犯條例修訂。所有發起人其後或當時都是公民黨成員。查錫我每次均有參與遊行，「我哋大熱天時行出嚟表態，都唔係無意思或者無用」。他指當中爭議非單純是法律問題，而是已上升至政治問題的層次。作為香港法律界一份子，他認為必須讓港府及中央了解其取態。
「破壞法治精神，絕對唔係愛國」
香港國安法 2020 年實施後，多名民主派人士變階下囚，當中查老特別提到黨友郭家麒，「我好心酸……第一日係忍唔住喊，郭家麒係一個謙謙君子……任何一個人，都唔應該咁對待」。
查錫我是 47 人初選案被告何啟明的代表律師。他在庭上為何啟明陳辭之前，曾問法官：「我想弄清楚係咪仲行緊普通法，如果已經改變咗，改行其他地區嘅法律，我只可坐低」。在他心目中，「法治」是香港相當重要的一部份，「香港最大嘅價值就係有良好嘅法治制度」。
「相聚係緣份，分手都係緣份」
公民黨被視為溫和民主派，查老形容「可以話係和理非非」，但最終亦難逃清盤。查老指清盤並非意氣用事，最大原因是「空間少咗」，多個黨友在 47 人初選案尚未定罪，已被長時間還押，包括時任黨魁楊岳橋，「完全無人驚就假嘅，好多人都會擔心」。查老指公民黨創黨之初已訂明，接受捐款必需清楚得知來源，亦不接受海外捐款。在近期社會氣氛之下，「唔會有好多人捐錢畀公民黨」，欠缺資金亦難以繼續運作。
查老固然對亡黨感到傷感，但亦接受「無嘢係不變……相聚係緣份，分手都係緣份」，最重要是在每一個當下，「我哋做咗應該做嘅嘢」。他認為公民黨並無「行錯任何一步」，每一個決定「係考慮對香港發展同民生有無幫助」。那麼是否代表香港政黨之路已絕？查老有另一看法，「我哋今日無咗個公民黨，將來可能有機會有好多唔同嘅黨，我哋唔知嘅」。
回歸 26 年，查錫我形容現時香港「失去咗好大嘅民心」，「點解咁多人移民？個個都知道移民係好辛苦、連根拔起係一個好難嘅抉擇」，要想辦法挽回，先要承認民心已失，「信心係好奇妙嘅一件事，你要破壞佢好容易，但點樣挽回民心，需要一段時間同好多功夫」。
「不能因為害怕坐監而唔講真話」
作為仍然願意公開談政治議題的少數人，查錫我笑說：「我做咗個抉擇，想做國王的新衣個細路仔」。「講真話」對查錫我來說尤其重要，「如果我講真話係要坐監嘅話，我都係有心理準備係要坐一次監…… 我亦都不能因為害怕坐監而唔講真話...... 不過坐咗出嚟我就唔會再留喺香港，因為我唔能夠喺一個無辦法講真話嘅地方生活。」查老再三叮囑記者，「你唔使嚟（監獄）探我㗎喇」。他又不忘補充：「不過我相信暫時都唔會有呢個情況」。查老寄語港人：「我哋咩都可以無，但唔可以無咗良心；我哋乜嘢都可以放棄，但千萬不能放棄希望」。
