模特兒女友爆偷食 細貓應智越疑似出軌 IG出Story回應
噚晚(24日)模特兒Kero Lau喺IG上載一張有好多佢同男友過往甜蜜合照嘅黑白相,並寫上關於圈中男友出軌及二人已分手嘅千字文,有傳媒報道指呢位出軌渣男疑似係《全民造星》第一季獲得第七名嘅細貓應智越。
Kero Lau嘅千字文就講二人一齊兩年半,剛拍拖時男方經濟環境唔穩定,二人一直互相扶持,去到男方事業開始有起色,女方亦甘願做一個地下女友。不過一個舞台劇嘅工作,令到佢哋嘅關係及習慣出現變化,起初Kero都未有察覺,直至有一晚男方返屋企將佢叫醒,並話導演想佢同女主角私底下多啲溝通。去到第二朝起身,Kero覺得奇怪,所以打開男方電話,並睇到一篇關於經理人叫佢唔應該喺公眾地方拖女主角手嘅長文,之後佢仲搵到女主角寫俾男方嘅曖昧情信。
Kero再話男方喺7月12日主動同佢分手:「我在七月頭搬到我們的共同朋友家中暫住,男方給我說法是希望冷靜。由七月初到七月十二號,男方給我的聯繫少之又少,我情緒一直反覆,不斷希望可以和好。當我有情緒失控時,男方曾經給我一個日子,說會給我一個說法,後來拖拖拉拉,在七月十二號,男方主動跟我分手。」並喺朋友圈話Kero不求上進::「後來在不同朋友口中聽到,男方向外說法是我不求上進,沒有與他同步,而且在爭執中說出「已經不愛他」的說話,令他心傷透。他希望可以離開我,他想向自己的目標去飛。生平第一次聽到男人說女人不上進的我,一時間莫名其妙,這兩年多我再多懶惰,也能負責我們之間多於一半的生活費,我是如何不上進?」之後,Kero表示唔明白,直至男方喺電話上將6月30號定為「紀念日」,佢就明白來龍去脈,因為呢個「紀念日」並唔係屬於佢哋,而係屬於男方同女主角。而大概嘅事件就係:「完整的故事大概就是在舞台劇中另結新歡,被發現後,在我短暫離家時因利成便,用「不上進」與「傷他心」作原因,處死我們的愛情。」
Kero指男方一直好驚佢公開呢件事,所以不停道歉及承認出軌:「如果有人認為我想用這篇文章將男方的事業拉下,我相信男方應該知道,我本來可以寫的材料大概還有三分二。這一個星期以來,男方一直害怕我會公開此事,親口承認自己出軌,一直用「我道歉囉」「我錯哂囉」來表達關心。而經理人亦一直對我朋友旁敲側擊,用「跳掣」形容我,認為我聽到男方所謂道歉,就應該從容放下,開開心心面對人生。」最後Kero表示決定公開事件:「我曾經希望他會回頭,後來慢慢希望他可以關心我一下,但日子一直過,我才發現這個人老早已經走遠。我最後一直等他一個真誠道歉,但一直等不到,聽到的是一堆發條式的「對唔住囉」。最後我決定自我解脫,公開此事,不想自己回頭,亦不想他的鬼話變成大家眼中的真相。我不知道公開此事會令自己的生活變成如何,但我希望找到一個出口,將此事完結,亦希望男方知道,世界不會圍著你轉,你沒有尊重過的,一樣不會向你尊重。」
呢個PO一出,唔少好友及網民紛紛留言支持Kero,例如「雖然付出左好多,但及時發現即刻止蝕都好」、「或許是一種解脫!既然不是好人,早走早着!加油!」、「你一定遇到更加好既男生!成長是唔容易,但有我地陪住你」、「唔好blur左佢個樣啦,應該show啲渣男真面目俾大家睇下嘛」、「support 好欣賞你有呢份勇氣講出嚟」、「恭喜你無浪費更多時間在錯的人身上」「早啲離開渣男! take care」及「加油!支持你Kero 渣男根本不值一提,抵佢做極都唔紅」等等。
去到今日,細貓疑似喺IG出Story回應事件:「不想回應太多,不想傷害大家,我承認我在這段感情上有很多不足嘅地方,這段感情已經畫上句號,這段回憶珍而重之,祝福對方。」而Kero期後亦有出Story回應:「不是做得不足,而是說謊出軌,你沒有能力回應太多,因為你一早向我傷害。不是做得不足,而是說謊出軌,唯一人話是這段感情的確已經「劃」上句號,隨手丟棄嘅感情不用回憶,放在垃圾堆中如何珍而重之。如果你仍然認為用一副「官腔」就可以苟且過關,我祝福你可以心存僥幸,顛倒是非。」
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!