歐錦棠爆TVB製作慳皮真相 高層同佢講︰求其拍都有人睇

越來越多藝人開youtube channel，其中一個係做過亞視同TVB嘅歐錦棠。打滾電視台多年，阿棠之前爆過拍大台處境劇嘅藝員原來相當好搵，仲話月入最少17萬，睇到唔少人嘩嘩聲。早排阿棠再拍片爆大台內幕，都係同錢有關。

已經離開TVB多年嘅歐錦棠，話喺2018至19年期間，同某位TVB管理層喺一個場合碰面，傾傾吓講到製作上嘅問題，對方透露某次內部開會時「（TVB）啲老細都講咗，其實都唔使擺咁多資源落去拍大製作啦，唔需要啦。點解呀？我哋求其拍啲嘢出嚟都有人睇」。歐錦棠表明呢番說話唔係作，但亦唔會爆係邊個講。阿棠認為大台「所謂管理層有咁嘅思維，你個機構仲可以有咩進步？」。

歐錦棠又提到當年曾經被王維基創立嘅香港電視（HKTV）邀請過檔。阿棠話當時喺TVB人工已經算唔錯，但係HKTV搵佢時都樂於加更多人工畀佢，而且歡迎阿棠提出節目構思，連電視台少做嘅宗教節目、舞台劇都話可以。睇落自由度好大，但係歐錦棠反而覺得電視台製作成本高，管理層方針要清晰，唔係演員有咩「瓣數」就開，因此決定同TVB續約，而大台亦加佢人工兼立即簽約留人，令歐錦棠更相信電視行業有競爭先有進步。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！