每間公司都總會有幾隻護主犬、喵喵怪同埋。。。紅唇蛙？

Pokemon Go人人話玩，相信大家又重新認識咗唔少寵物小精靈。其實唔同精靈有唔同個性，你望下Office，一個二個同事啲性格打扮其實都似足寵物小精靈，等我話你知Office有邊9種寵物小精靈啦：

1. 仆心仆命忠臣－護主犬

公司總有幾個同事非常忠心，簡直係公司忠實Fans，老細話一，佢唔會做二。你講公司壞話，佢第一時間出嚟反駁你。呢種同事咪十足護主犬，未得到精靈訓練員命令之前一步都唔會郁，對訓練員極度忠誠，為咗保護訓練員仲會搏哂命咁擊退敵人。

2. 把口啷過油嘅擦鞋仔 －喵喵怪（火箭兵團嗰隻）

老細身邊梗有個擦鞋仔，為咗氹老細開心無所不用其極，讚到老細天上有地下無，知道哂老細有咩喜好，盡力為老細解決「私人問題」。平時老細唔喺到，就口花花周圍撩女仔。呢啲咪係火箭兵團喵喵怪嘅化身，將取悅老細當做自己人生目標，所以不惜一切去捉罕有小精靈氹老細，務求成為老細頭號愛寵。見到靚女就情聖上身，但人哋當佢係兵咋。

3. 男／女神－伊貝

咁大間公司，總有幾個靚仔靚女嘅，最緊要佢哋日日都打扮到花枝招展，望住佢哋都真係件賞心悅目嘅事，人都精神啲。如果用寵物小精靈去形容，小編就覺得係伊貝啦，未進化之前個樣已經好得意好可愛，好想摸下佢，性格仲好溫馴。伊貝仲可以進化成8種唔同形態，種種都好高貴，有種神聖不可侵犯嘅仙氣散發出嚟～

4. 扮後生中女－紅唇蛙

一間公司都有一定有一堆老姑婆，樣又唔好，性格又衰，鍾意針對後生女同事。明明年紀有返咁上下，都係要著短裙小背心扮後生女，一見到有靚仔同事就拋生藕。就好似成個紅唇蛙咁，點都要show吓心口，樣又實在唔吸引，仲要成日獻吻，真係毛管戙。（P.S. 其實紅唇蛙性格好好，只係個樣差咗啲⋯⋯）

5. 新人－鯉魚王

正所謂新嚟新豬肉，新仔咩都唔識好正常啦，畀啲同事點嚟點去毫無反擊之力，同鯉魚王差唔多，人人都嫌佢弱，任人魚肉，而佢只要彈吓彈吓就好開心，咪好似新人咁有嘢做已經好滿足。雖然個個都覺得佢廢，偏偏生命力又好頑強，咩環境都生存到。而且呢一刻你可能佢傻吓傻吓嘅新人，話唔定他朝一日憑住股幹勁，一躍成為海中霸王鯉魚龍架！

6. 扮豬食老虎－傻鴨

有啲同事平時好似睇落無咩料到，但你又好奇點解佢可以喺公司生存咁耐，然後有時佢唔聲唔聲嚇你一驚，忽然做成單大生意令你覺得好Amazing。呢啲就係扮豬食老虎嘅同事，以為佢無害，其實收埋收埋唔話你知咋。咪好似小霞隻傻鴨咁，平時烚吓烚吓咁，小霞講咩都好似聽唔明咁，但成日又可以自己跳出精靈球，吹佢唔脹，有時又輕鬆KO敵人，真係唔知佢真傻定扮懵。

7. 老屎忽－卡比獸

講到明老屎忽，做咗咁多年，已經練精學懶，有咩工作拖得就拖，無論你幾十萬火急，佢都可以施施然咁hea做，收工走人就最有效率。呢個表現完全就係卡比獸，成日「得」喺路中心，又唔知自己大份阻住人哋條路，就同老屎忽一樣霸住個位又無貢獻，阻住新人上位。而且同卡比獸一樣好食懶飛，唔係食就訓。但係唔好諗住挑戰佢，你阻到佢搵食，有返咁上吓地位嘅佢一出手，可以搞到你工都無呀。

8. 黃馬褂－比卡超（小智嗰隻）

最驚遇到黃馬褂同事，有能力就話啫，無能力嘅話咪你幫佢做哂啲嘢，做得好就佢嘅，做得唔好就你𡃤嘢啦。而且佢有幾勁多特權，你又唔得罪得佢，無啦啦要好似下人咁當佢哋少爺小姐咁服待。咁咪好似小智隻比卡超，明明係小精靈，話唔想入精靈球就唔入，話唔想進化就唔進，唔想行咪坐喺小智個膀頭到，佢同小智嘅關係咪佢是主人小智是狗囉～之但係至少比卡超個樣可愛又有實力，公司個黃馬褂就⋯⋯

9. 老細－夢夢

點解老細係夢夢？係咪因為老細能力好高？嗱，呢啲就唔同公司唔同講法嘅。但可以肯定嘅係，老細同夢夢一樣，都係神龍見首不見尾，特別係頂級大老細，日日四圍飛， 環遊全世界，你啲普通職員呢世都唔使旨意見到佢。唔好諗住有一日會取代到佢，喺佢眼中，你只不過係一粒塵，就好似夢夢望住你班精靈訓練員咁，想捉我？下世啦你班庸人。

圖片來源：動畫《寵物小精靈》