永遠都同老細唔啱嘴型？研究：父母教養方式影響

有無試過被老細處處針對？唔知點解就算轉幾多間公司，你都覺得個上司好乞人憎，你點都頂唔順佢？如果係咁，一係你真係咁唔好彩次次都遇到衰老細，一係其實係你自己唔識同人相處。

點解咁講？因為近期國際期刊《Human Relations》就刊登咗個研究，發現童年時如果感受唔到父母嘅關愛，大個咗就比較唔識處理人際關係。呢個研究根據英國精神科醫生John Bowlby嘅依附理論（attachment theory），將人分為「安全型」（Secure attachment）、「焦慮型」（Avoidant-attachment）同「排除型」（Resistant-attachment），搵咗美國俄亥俄州8間餐廳，包括28個上司同152個員工進行分析。

結果發現，自細受到父母悉心照料同關懷嘅「安全型」員工，唔會點受到上司嘅行為影響。但係如果係細細個就不被關心嘅「焦慮型」就最受上司一舉一動影響，因為佢哋比較敏感，即使老細純粹心情唔好先黑你面，佢哋都會覺得係咪自己問題。而「排除型」就最難做Team work，因為佢哋只係想拿拿聲做完嘢就返屋企，所以就比較難同人相處合作啦～

之但係又唔可以完全賴哂落員工到，因為你老細係咩型都有影響架！就算你係「焦慮型」員工，遇到個「安全型」上司咁就會容易啲相處，因為呢種上司比較supportive，仲會令「焦慮型」員工發揮最高效率添～

所以呢，作為打工仔，若然覺得老細針對你，一係就改變睇法，佢發爛渣就當佢更年期，完全唔受影響，一係就轉份工，話唔定遇到個「安全型」上司～