江疏影名字引中韓網民罵戰 齊睇內地網民狙擊事件簿

江疏影
江疏影

憑劇集《三十而已》人氣急升嘅內地女星江疏影,近日竟然因姓名掀起中韓網民罵戰。《三十而已》近日喺韓國熱播中,而佢個名就被韓國傳媒指同「姜素英」同音,之後有韓國網民問點解佢要取一個南韓式嘅名字,同埋佢個樣有啲似佢哋民族喺朝鮮時代被清朝捉走嘅人嘅後代。事件傳到返內地後,唔少內地網民都不滿江疏影被指係韓國人,結果引起兩地網民罵戰。其實內地網民嘅「玻璃心」都唔係第一次碎,而家就同大家數下近年內地網民玻璃心事件簿啦!

Angelababy
日前,中國「知名作家」劉信達喺微博鬧爆Baby身為中國人,偏偏用英文名。佢仲話內地人對外國節日及洋化覺得反感,希望Baby對自己個英文名反感,建議佢用返中文名喺內地發展。呢個PO一出,當然引起內地網民熱議,更有人留言話:「崇洋媚外,必須封殺」及「漢奸藝人楊某」等等。

Angelababy
Angelababy

李孝利
喺節目《玩甚麼好呢?》中,韓國性感女星李孝利和劉在錫討論係唔係要取「藝名」,之後李孝利就話自己想要一個中國風嘅名,並講出「마오」(毛)。唔少內地網民睇完都喪鬧,話李孝利侮辱中共前領導人毛澤東及辱華。

宋芸樺
台灣演員宋芸樺喺2015年憑《我的少女時代》紅遍中港台,之後佢頻頻到內地賺人仔,但喺2018年會就被網民翻舊賬,指佢曾受訪時答「最喜歡國家是台灣」,一班內地玻璃心網民隨即話佢係「台獨分子」,仲呼籲要封殺佢。之後,宋芸樺喺微博發文話「我是中國人」、「台灣是我出生的地方、祖國大陸是我夢想實現的地方」,又話兩岸永遠是一家人。

韓國YouTuber Hamzy
韓國人氣YouTuber Hamzy,早前喺包飯和泡菜嘅影片下讚好批評內地人嘅留言,被內地網民截圖,結果被指佢認同「辱華」言論。之後,Hamzy喺微博上道歉及或自己尊重內地嘅飲食文化,但仍遭內地經理人公司解約。Hamzy呢個舉動令到韓國網民不滿,因此佢亦有向韓國網民表示係經理人公司要求佢道歉,而佢自己就認為泡菜同包飯都係我國嘅文化。

容祖兒
喺前年,容祖兒(Joey)喺社交網站上載一張戴上口罩嘅素顏相片,並寫上《空港》歌詞:「只知要飛」。但佢之後被內地網民鬧爆及認為佢係支持香港示威者。躺著也中槍嘅Joey事後將貼文刪除,及再喺社交網站澄清,留言話自己從未支持過港獨,同埋為自己嘅粗心大意感到抱歉及自責。

泰國男星Bright
憑泰國BL劇《只因我們天生一對》喺內地人氣急升嘅泰國男星Bright,喺上年因點讚女友Weeraya轉發嘅文章「武漢病毒實驗室有1,500種物種,包含用來測試疫苗的蝙蝠」。雖然事後Bright已經道歉,但有網民搵到佢同女朋友兩年前喺IG打情罵俏嘅互動,Bright讚Weeraya嘅照片「很漂亮像中國女孩」,Weeraya回咗一句「What!?」。之後,有網民問她穿着風格,佢形容係「台灣女孩喔」。內地網民認為佢哋係支持台獨,叫佢哋辱華就唔好賺中國錢,結果掀起中泰罵戰。

泰國男星Bright和女友Weeraya
泰國男星Bright和女友Weeraya

BTS
紅遍全球嘅南韓組合防彈少年團(BTS)喺上年獲得「James A. Van Fleet Award」,佢哋喺講得獎感言時,期間講到佢哋會永遠銘記兩國喺韓戰共同經歷過嘅苦難歷史。之後,唔少內地網民都批評佢哋辱華,更有網民話要脫粉。

吳鎮宇
喺上年,吳鎮宇因要到內地準備拍攝綜藝節目,所以要去內地酒店隔離14日。喺隔離期間,佢就開live同網民互動,點知佢喺直播中講咗3次「你們中國」,跟住一班內地網民就好不滿。結果喺第二日,吳鎮宇再開live強調自己同仔仔都係愛國嘅中國人。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!