汪明荃揀最喜愛MIRROR成員 竟然答Anson Lui！陳志雲錯埋一份 叫盧瀚霆做盧冠廷

Yahoo 娛樂圈

阿姐汪明荃將於11月舉行個唱，除咗推出搵林家謙作曲Wyman作詞嘅新歌Make My Day之外，近日仲接受多個訪問邀請。上星期阿姐就出席前TVB高層陳志雲搞嘅直播訪問，過程中提到同新一代藝人嘅交流，點知阿姐同志雲大師先後搞出笑話！

陳志雲突然問阿姐MIRROR十二子之中佢最鍾意邊個，阿姐一個措手不及，諗咗一下就答「Anson……Lui！」
陳志雲突然問阿姐MIRROR十二子之中佢最鍾意邊個，阿姐一個措手不及，諗咗一下就答「Anson……Lui！」

陳志雲提到唔少新一代藝人好鍾意阿姐，而MIRROR成員Edan（呂爵安）更加去過阿姐屋企拜年。阿姐就話Edan因為同過羅家英拍節目而熟絡，而後輩們好有心每年都約拜年，就連同過Edan、Anson Lo（盧瀚霆）及Jeremy（李駿傑）拍過《男排女將》嘅Stephy鄧麗欣都有份。後來陳志雲突然問阿姐MIRROR十二子佢最鍾意邊個，阿姐一個措手不及，諗咗一下就答「Anson……Lui！」。志雲大師大笑完再幫阿姐解圍，話「即係你係『登神』囉，Edan 加Anson囉！阿姐快人快語呀！」，阿姐開始知咩事，就話「唔係Anson Lui，Anson Lo！兩個囉即係」。

陳志雲將盧瀚霆讀成「盧冠廷」，立即掩咀大笑道歉
陳志雲將盧瀚霆讀成「盧冠廷」，立即掩咀大笑道歉

志雲大師好快就轉話題，講起Edan「早排有啲困惑」，即係佢同林明禎「了解中」一事，並且問阿姐有冇留意。阿姐話有，仲認為「嗰啲好閒啫，咁年青！又唔係有家室……有咩問題？」。轉個頭陳志雲同Liza姐一齊讀留言，點知今次到志雲大師將盧瀚霆讀成「盧冠廷」，立即掩咀大笑道歉，仲話「唔好罰我！」。

盧瀚霆早前搵咗阿姐拍Dance Challenge片
盧瀚霆早前搵咗阿姐拍Dance Challenge片

另外，汪明荃口中嘅「Anson Lui」盧瀚霆，早前搵咗阿姐拍Dance Challenge片，一齊跟住教主嘅歌曲Hey Hey OK跳舞，打破兩間電視台嘅壁壘。唔知嚟緊阿姐演唱會，會唔會有「登神」現身？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！