法與情｜葉璇直播崩壞造型原來係角色需要 陳靜淡妝上陣雙眼即跌watt

MakerVille原創劇《法與情》搵嚟葉璇、關智斌（Kenny）、陳靜（Dada）、賈曉晨（JJ）、余安安、謝安琪及李芯駖等人主演，劇中演員喺噚日（17日）進行拜神儀式。

43歲嘅葉璇曾被封為「古典美人」，近年佢將工作重心轉往內地，較早前佢加入直播帶貨行業，除咗喺直播中以油笠笠嘅孖辮造型加上淡妝出鏡，由於保溫衣服太貼身嘅關係，令大走樣嘅身形曝光於鏡頭前，腰間更加有一截截贅肉，驚變「車胎人」，葉璇又喺直播過程中懶理形象，試食之後向鏡頭做出撩牙動作，令唔少內地網民都直言認唔出葉璇，極為驚嚇。喺噚日佢就話直播帶貨嘅造型係角色需要，仲話呢個角色好成功，佢可以扮靚扮醜、扮老扮嫩，甚至扮男扮女都得。而佢今次喺劇中將會飾演隱世富婆，仲會同Kenny有感情線，同時亦會同JJ爭仔。

另外，擁有34E嘅陳靜（Dada）一向以性感見稱，佢擁有天使面孔及魔鬼嘅身材，深得網民喜愛，更連續三年入圍全球百大美女榜。Dada今次喺劇中飾演被控誤殺案嘅單親媽媽Liza，而佢仲搵咗謝安琪飾演嘅陸哲為佢辯護。佢今次會以淡妝上陣，而噚日佢亦以角色造型現身，雖然除下大眼仔嘅佢，眼睛跌watt，睇落即時冇咁精神，不過皮膚狀態就好好。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！