雅虎香港新聞 著泳衣要打底？騎呢泳衣Top10！大媽風繡花泳衣令人腦洞大開 第一位係超人氣明星自家品牌？
Yahoo編輯團隊致力為你搜羅優質產品及優惠價格，文章內部份連結商戶與雅虎有合作關係，定價及供應量有機會更改，一切以商戶最新資料為凖。
轉眼又到5月，政府亦都宣佈重新開放泳池同沙灘，大家準備好泳衣投奔初夏未呢？搜羅打卡泳衣同時，間唔中會見到啲令人懷疑人生嘅設計，編輯特別精選咗完全睇唔明點著出街嘅泳衣，同大家開心share一齊感嘆時裝嘅奧妙，鍾意獵奇嘅你絕對唔可以錯過！
【立即睇】Yahoo Style 專頁，跟貼最新潮流及優惠情報
第10位：泳褲都要打底？？？Missguided 勾花泳褲
每次去ASOS尋寶都一定會見到騎呢時裝，當然泳衣都係一個出色嘅項目，每次都嬴九條街。先嚟第10位，小資女品牌Missguided推出咗波希米亞風格編織泳褲…但織花透視程度太高，估計都要打底先著到，但打完底高腰設計又似小朋友尿片，其實係點樣著嘅呢？
Missguided crochet high waist bikini bottoms in white
價錢：$76.2 原價：$190.5
第9位：游水都要做公主！Sabbia 網紗袖泳衣
無諗過公主袖都可以應用喺泳衣，講緊唔係泡泡袖，而真係網紗公主袖… 網紗公主袖再加上古怪裸肉色兩件頭泳衣，但又用織花帶連起上下泳衣，整體就係令人非常費解嘅設計，仲會好奇到底濕水後兩個袖會變成點，就算唔落水都屬於騎呢時裝，有冇勇士想挑戰？～
Sabbia - 網紗拼接印花分體泳衣
價錢：$150
第8位：上下失守奇怪剪裁！Michael Costello 流蘇泳衣
本身流蘇泳衣並唔奇怪，呢件怪在個剪裁都係唔知點樣游水…下身超高釵設計，長流蘇睇落都有相當重量，一濕水向下墮分分鐘上身比堅尼同高釵泳褲就會向下墜，同樣係上下都會失手嘅走光泳衣，或者都係屬Instagram打卡限定，真係游水就不了～
Michael Costello Rhi One Piece
價錢：$1,318
第7位：零遮蓋全裸露！Solid 鏈條比堅尼泳褲
近年泳衣愈嚟愈少布，但呢款直頭係無布，只有極少極高釵前蓋布，後面只係金鏈加扣飾，著上身都應該唔會太舒服，曬太陽又會吸熱灼傷皮膚，就係比小廢包更廢嘅廢Bikini，真心好奇係咪真係有人買…
Solid Bikini Bottom
價錢：$41
第6位：超強浮力水泡風格！ASOS LUXE 3D floral bikini
絕對係第9位公主袖泳衣嘅極致版！同樣都唔係設計嚟游水，只可以著去Pool Party打下卡，極浮誇兩個泡泡袖套縫滿布花瓣，尿片剪裁比堅尼亦都好busy地完全佈滿布花瓣，累贅又零實用性，極厚重布料著去船P都一定熱到出汗疹，又一令人費解嘅騎呢設計。
ASOS LUXE 3D floral bikini in blue
價錢：$634
第5位：根本就係全裸！Emilyn極性感透視泳衣
黑色高釵比堅尼本身都夠性感，再加埋暴走式cut out，泳褲亦唔係緊身貼身設計，移動時完全咩都睇晒，著咗等於無著根本就係全裸，雖然睇落好瘋狂，但係YESSTYLE上嘅人氣熱賣單品，有興趣的話歡迎挑戰！
Emilyn - 套裝:單肩網紗拼接比基尼泳衣上衣 + 綁帶下裝
價錢：$60
第4位：全透視公主風！短袖蕾絲泳裝
蕾絲泳裝本身都易出事，全透視透明蕾絲泳裝更加係難以想像，模特兒示範都要加肉色打底先駕馭到，但加完肉色打底又極有大媽feel，完全係一件令人難能理解嘅設計，就連著嚟打卡唔游水都9成會fail。
CUCURBIT - 短袖蕾絲泳裝
價錢：$223.7
第3位：ASOS Design 前後失守男裝泳褲
男裝泳褲就好安全？錯啦～ASOS都有唔少「精彩」男裝泳褲，包括呢條同樣近乎裸體嘅丁字內褲，可能因為布料極少，所以價錢都相對比較親民，後背高釵到近於全裸，加上搶眼彩藍色更加觸目全場，見到都有817個likes，令編輯好想搞返個Swim Thong Challenge！
ASOS DESIGN swim thong in teal blue
價錢：$105.0
第2位： 大媽登台風格！Ann Summers 透視繡花泳衣
英國內衣品牌Ann Summers今年推出咗透視泳衣，採用透視黑色網布，胸前繡有奇異珠片蕾絲花紋，再加埋極高釵大露背，基本上一移動就會上下失手走光，除咗叫價要$391外，編輯仲見到有600個like…好好奇會唔會成為Instagram下一件年度最hot item。
Ann Summers Malibu mesh cut out swimsuit with sequin embroidery in black
價錢：$392
第1位：網紅瘋狂Diss！Kylie Swim 劣評如潮大尺度泳衣
終於要打大佬啦！金家小妹Kylie Jenner推出Kylie Swim，一推出引起狂烈熱搶，但搶完後大家瘋狂呻中伏，仲有大量diss Kylie Swim嘅YouTube video，實在非常精彩！
Kylie Jenner一向行美國性感女朋友風格，大家都預咗設計一定性感到極點，但大家都無諗過少布到只可以企定定影相，加上依據Kylie好身材設計，正常身材著非常鬆身，只要稍有移動就會完全走光。而且布料極透薄，基本上同全裸完全無分別，加上價錢絕對唔平，一套叫價近$700，排第一位絕對實至名歸！
Cut it Out
價錢：$627
緊貼潮流、購物資訊，就Click入以下連結睇更多啦～
🎉📱Style Facebook：https://www.facebook.com/YahooStyleHK/
🎉📱最新優惠碼/網購攻略：https://yahooshopping.myguide.hk/onlineshopping
潮流熱話：
Met Gala 2022｜「時尚界奧斯卡」紅毯造型最出位圖集！話題女王Kim K穿起夢露3千7百萬水晶晚裝、「死侍夫妻」華麗現身
Hermès手袋｜6款愛馬仕手袋比MIRROR飛更難搶！「袋王」喜馬拉雅Birkin二百萬成交、Lindy Mini教主Anson Lo都有
