港女講日：痛到暈唔係誇張！分享「5大M痛等級」畀身邊男友睇

M痛唔係病，但痛起上嚟真係攞人命…相信唔少女士都飽受經痛之苦，甚至痛到番唔到工，影響日常生活!

日本插畫家あーちゃん(@a_chan_paint) 有感男女對於M痛認知有好大分歧，加上冇M痛嘅女生都未必理解有幾痛，於是將每個女生遇到嘅「M痛程度」變成插畫，等大家都容易明白。

總括而言，MM痛分5種程度：

1.反而仲精神

好少見呢種女生但真係有架，會因為「身體排出污穢物」而產生暢快感。

2.間中唔舒服

呢種人應該最多，腹部有唔舒服嘅感覺，但覺得「只不過係M痛，忍一忍就過啦」，網主偏見認為講大話唔上游水堂嘅女生都係呢一類。

3.難受

面色差，望落似好唔舒服咁，面對旁人關心「你OK嗎?係唔係唔舒服」，只能回答「我冇事(因為M痛)」。

4.超難受

痛到出唔到聲，因為太痛而情緒不穩，有可能係婦科病，最好去醫院check check。

5.會暈低

痛到行都行唔到甚至會痛到暈，呢類女生為數唔多但確實有人係咁，好易被人誤會係講笑或被取笑「有冇咁誇張呀」，好慘!

貼文一出引來唔少「4號」女生哀鳴:

「我介乎4與5之間，因為朋友大部份都係2，成日畀佢哋笑『月經邊有咁痛呀?你太誇張…』」

「我就係4號，非常明白痛到快暈嘅感覺，但都係要忍住，旁邊嘅人就會話『睇起嚟唔係好痛呀』，問題係返到屋企自己一個人痛到5號咁危險時又冇人見到，你哋理解我嘅痛苦嗎?」

「我係第二日4號之後3號，到而家都仲係好討厭嗰個明明肚好痛仲逼我跑馬拉松嘅老師!」

「我屋企附近間學校規定『經期一樣要落泳池』，叫學生塞棉條。」

「我讀書時體育女老師同我講『經期第8天?會唔會太耐?呃人呀?』」

每個女生經期長短不一，M痛症狀都好唔同，男人無法理解都算，但同樣係女生卻無法體諒女生嘅痛，先至係最大打擊呀。

圖片來源：タケダ健康サイト