港姐2023︳勁過AI司儀 陳百祥透視泳褲look主持03年港姐 被指嚇走30萬觀眾

今年TVB為2023年度香港小姐決賽加入嘅新元素，就係推出首位以AI創造嘅司儀Evelyn陳婉嫣。TVB聲稱係透過綜合過往50年嘅港姐冠軍參賽片段作為參考指標，從而創造出Evelyn。據講呢位AI司儀名字嘅由來，都係根據歷屆港姐冠軍嘅中文及英文名字資料所生成，而意思就係聰明又迷人。至於姓陳，就係因為歷屆港姐冠軍中姓「陳」嘅比例最高，一共有6位。

Evelyn表現如何，星期日就知。但係正好20年前，身為司儀嘅陳百祥以一身造型搶盡風頭，你未必記得2003年港姐冠軍係邊個，但一定記得當年叻哥個泳褲look。

2003年港姐決賽由陳百祥、曾志偉及鄭中基做司儀，該屆決賽為催谷收視，佳麗一晚要五度以泳衣出場，就連3位司儀都要水著示人。曾志偉同鄭中基以沙灘裝及潛水衣上台，而向來造型必爆嘅叻哥，就以透視魚網衫內襯三角泳褲，成功突圍而出。不過當晚港姐決賽平均收視得26點，比起前一年（2002年）港姐決賽下跌5個百分點，當時有傳媒話係「阿叻嚇走30萬觀眾」。

觀眾以外，當年商台主持人鄭經翰、林旭華同查小欣分別開咪發聲狠批，著名填詞人林振強更因為阿叻呢次嘅造型撰寫文章明寸，文中一句「任何電視節目，只要見阿叻有份出現，你就知道，這個節目必會變為業餘、不認真，和像馬戲團」至今仍為網民津津樂道。當年廣管局亦收到至少5宗投訴指叻哥衣著不雅。

事隔多年後，前年（2021年）港姐決賽，2位初次擔任港姐司儀嘅周嘉洛同丁子朗，就「薪火相傳」復刻阿叻嘅「透視裝襯泳褲look」，效果同樣出事，證明問題唔係出於阿叻，而係個造型出事……囉，應該係除非唔係。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！