港泰混血兒鄺玲玲主演泰國GL劇爆紅 精通四種語言仲係選美冠軍

泰國BL劇近年大行其道，越來越受歡迎，唔少泰國男星紅遍亞洲。不過近日GL劇《我們的秘密》（The Secret of Us）意外爆紅，除咗打破 BL 劇壟斷市場，更成功捧紅兩位高顏值女主角－港泰混血演員鄺玲玲Sirilak Kwong及泰國新生代演員Kornnaphat Sethratanapong（Orm）。

現年29嘅鄺玲玲係一名港泰混血兒，喺香港出世，直至17歲先回泰國，畢業於孔敬大學旅遊管理學系。除此之外，Sirilak 仲精通四種語言，包括泰語、英語、廣東話及普通話。去到2018年，樣貌標致嘅佢仲被加冕為孔敬Khao Suan Kwang小姐，其後透過試鏡，成功加入泰國第3電視台，成為旗下嘅女演員及模特兒，前年更喺泰國愛情劇《親愛的瑪卡莉》首次擔任女一，飾演精靈Theerak，更成功憑角色獲得 Global Star Media Awards 2022 嘅「Outstanding Rising Actress」獎項。另外，佢亦有參與「泰國通」胡慧沖（Roger）主持嘅《沖遊泰國》系列，成為嘉賓主持「叉燒姐」為大家捐窿捐罅探索泰國嘅最新資訊。

除咗劇集同綜藝節目之外，鄺玲玲仲曾擔任泰國人氣男星Win歌曲《Too Late》MV女主角，之後二人亦被拍到同遊韓國而傳出緋聞，不過二人雙雙否認戀情，澄清佢哋只係好朋友關係。

鄺玲玲喺《我們的秘密》中飾演皮膚科醫生Fahlada，喺國外留學遇上Earn（Kornnaphat飾），二人相戀三年，但某一日Earn突然分手。劇集播出最後一集後，佢哋隨即喺曼谷、澳門、香港舉行粉絲見面會，鄺玲玲就表示好開心，多謝香港粉絲支持同鼓勵，令佢可以自信地做自己，今次喺香港舉辦見面會可以話係完成咗一個心願，極具意義。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！