《溏心風暴3》劣評如潮 邊位演員演技最令人失望？

觀眾期待以久嘅台慶劇《溏心風暴3》上星期終於出街。點知播咗幾集就劣評如潮，甚至有《溏心》粉絲都話想棄劇。有人怪罪於劇情太老土、刻意講潮語同金句，亦有人認為《溏心3》嘅演員影響咗套劇。等我地同大家睇下邊幾位《溏心3》演員演技最令人失望。

1. 黃翠如

黃翠如演技麻麻基本上好多觀眾都知，開心傷心都係同一個表情。劇中飾演方希文，講到佢男朋友李明基（馬浚偉飾）過身時，佢完全表現唔到痛苦，連眼淚都擠唔出來。好彩劇中佢嘅戲份唔多，觀眾唔駛太擔心。

2. 夏雨

夏雨飾演黃永正，角色係個有恩必還嘅人，但每一集都講還恩，開口恩公埋口恩公，為咗還恩甚至犧牲全家利益，睇到觀眾好激氣。再加上劇中夏雨經常興奮過度，食食下飯都要全家起身唱歌，睇到個個觀眾冒起「黑人問號」。

3. 陳敏之

陳敏之拍劇多年，最多人記得係佢雙長腿。劇中佢要扮演一個木無表情、甚至可以話係「面癱」嘅黃以愛，就更加考佢演技。

4. 莊思敏

喺《溏心3》演許二太雅莉珊，照計名媛呢類角色應該難唔到佢。但係網友插佢演技浮誇，讀台詞又好生硬，一啲感情都無。不過佢拍劇唔多，應該有機會慢慢改進。

5. 阮兆祥

阮兆祥飾演梁贊（Like Gor），劇中角色好煩，成日做野都為呃like。佢同梁順華（關菊英飾）兩姊弟文化水平低，經常搞事，得罪人多稱呼人少，睇到人眼火爆。其實Like Gor呢個名，係咪影射緊……叻哥？係的話，祥仔比起叻哥，又真係未夠煩厭嘅……

除咗以上呢五位演員之外，有冇邊位《溏心》演員嘅演技最令你失望呢？