溫碧霞瞞老公咀女隊酒自殘

藝人溫碧霞與陳漢娜在新片有咀戲，前晚二人出席宣傳活動，溫碧霞老公何祖光亦有捧場，問可有向老公備案？她搞笑說：「冇，畀Surprise佢！」又自爆每次埋位前都飲酒，飲到樣都殘埋！

溫碧霞、關智斌、陳煒、郭奕芯與陳漢娜等前晚現身《亞洲電影節2019》宣傳新片《墮落花》，與陳漢娜有咀戲的溫碧霞，自言為電影犧牲不少：「為咗投入角色，我足足減咗5磅，得番45kg，以我嘅身形嚟講算多，同埋每次埋位都要飲酒，搞到個樣好憔悴。（老公心痛？ ）值得嘅，佢都有嚟捧場。（有冇話佢聽有同性咀戲？）冇，畀Surprise佢。」

至於陳漢娜表示拍咀戲沒有尷尬：「拍嘅時候冇乜嘢，反而配音時睇到情節有啲怕醜。（有冇同父母交代？）冇，好少同佢哋講工作。」問今次是否最豁出去的一次？她說：「之前拍《G殺》仲大膽。（劇情需要，唔介意裸露？）係，冇底線。」

關智斌願獻出片酬

而關智斌被問到其主演電影《任性的你》停工一事，他坦言：「真係好事多磨。知道欠7位數製作費先可以復拍，導演喺度努力中，我哋練咗好耐嘅戲份全部未拍，同白只有共識，希望年底前盡能力復工兼煞科。」問到突然空出檔期有何安排？他說：「月底會去影寫真集，明年1月會拍一套馬來西亞電視劇。（英皇有興趣投資《任》片？）錢同文件方面嘅事比較複雜，我靜待佳音。（不如你攞錢投資？）我何德何能！其實今次因為鍾意劇本，所以收平咗，我唔介意攞番晒啲片酬出嚟，但應該幫唔到幾多！」