潔癖嚴重 劉嘉玲內地拍戲要酒店拆廁所 同梁朝偉屋企一人一廁

梁朝偉同劉嘉玲呢一對影帝影后級夫妻，外界向來認為梁朝偉嘅內向沉鬱，同嘉玲姐嘅豪邁性格好大對比，喺生活習慣上佢地亦大有不同。原來劉嘉玲非常注重乾淨，反而梁朝偉就好隨性而行。

劉嘉玲曾經喺TVB《最佳女主角》訪談節目提到自己嘅潔癖，嚴重程度係當年喺內地橫店拍《狄仁傑之通天帝國》時，居然要求酒店將整個洗手間的馬桶、浴缸及洗手盆全部換做新嘅！嘉玲姐解釋，佢會花好多時間留喺洗手間，所以對衛生好有要求，甚至每次北上都會咁要求。

相反老公梁朝偉冇咁在意，甚至返到屋企衫都唔換就攤喺張床，劉嘉玲睇見就會諗對方身上衣物「揩」過咩，帶咗幾多塵返屋企之類憂慮。但嘉玲姐認為係老公感到自在先至咁，自己太擔憂先係同自己過唔去。對潔淨有唔同睇法，所以佢地喺屋企係一人一個洗手間，一來負擔得起，二來唔使阻對方時間，

嘉玲姐唔止喺呢方面對梁朝偉包容，節目入面佢講起老公接拍電影嗰排，需要時間投入角色，認為對方係一個偉大嘅演員，所以會打理好家事，等梁朝偉無後顧之憂，放心追逐夢想。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！