香港4大潮式滷水店推介 必食米芝蓮滷水鵝

潮式滷水以多種香料藥材製作，多以滷水鵝為主角，味道香醇，絕對係一道功夫菜。喺香港地每一間都各有特色，有歷史舊店亦有年輕人主理，一齊睇吓邊間啱心水！

七十多年歷史 陳勤記

一間歷史悠久嘅潮州滷味專門店，至今已有超過七十年歷史，以其傳統嘅潮州滷水鵝而聞名，曾連續多年獲得米芝蓮推介。馳名滷水鵝以豐富嘅香料，包括八角、川花椒、南薑及京蔥滷成，雖然每一間餐廳用嘅滷水料都大同小異，但佢哋只用高級靚料，充滿誠意。將成隻鵝放入慢火燉煮，滷汁滲透鵝肉，味道濃郁而不過鹹，皮脆肉嫩，滷汁香氣十足，並且保留咗鵝肉嘅鮮味。另外仲有滷水鵝、豆腐、豬頸肉等其他滷味搭配～

90後情侶接手主理 榕基滷水專門店 1992

提到滷水店，總會諗到有歷史痕跡嘅滷水飯店。呢間滷水專門店就由一對90後嘅情侶主理，因為唔想阿姨嘅手藝失傳，所以就接手呢間滷水店同佢嘅手藝。餐廳嘅滷水特色係以清香為主，傳統嘅滷水鵝藥材味較重、味道偏鹹而且顏色較深；呢度唔會落老抽，靠獅頭鵝本身光澤同滷料自然上色，滷出嚟嘅鵝呈金黃色又唔會遮蓋鵝肉鮮味。另外亦推介滷香牛肚同爽脆滷鵝腸，前者軟腍入味，後者口感爽脆。

第三代滷水傳人主理 一品滷水專門店

北角潮州滷水外賣店，由第三代滷水傳人主理，專注於提供正宗嘅潮州滷味，現時仍沿用舊店嘅滷水汁，但就加咗啲新嘅香料令味道更加甘香。滷水鵝選用肥美鵝隻，經過精心滷製，鵝肉嫩滑，滷汁滲透每一啖鵝肉，香氣濃郁但唔會過鹹。滷水豬腳仔都係受歡迎嘅菜式，豬腳滷得軟糯而且富含膠原蛋白，食落唔肥膩，非常適合送飯。

米芝蓮滷水鵝 生記滷味

名人至愛嘅老字號米芝蓮滷水店，創立於1998年，秘製滷水汁選用貴價香料，如越南桂皮、內蒙古甘草、新會陳皮等，令滷水味道甘香有層次，濃而不膩，難怪咁受歡迎。鵝肉肉厚鵝味濃，肉質鮮嫩，鵝皮有油香，建議配埋滷蛋同酸菜一齊食，味道更豐富。另外都好推薦滷豬耳，豬耳被滷至軟糯，但保留咗一定嘅嚼勁，係必點小食！

文：Yanica
編：Cathy